「喜旺駒」第一季連蠃四場，當時啲飛都勁到不得了，包括初出，飛數一樣超勁。擺到明，就係我講嗰種，隻馬「弗」，馬房就一清二楚。呢啲馬搏殺打硬仗嗰陣，馬房會賭，近三季走咗去跑中距離嘅「喜旺駒」，一直喺度減分交代唔到。今季中終於肯縮程返短途，不過係泥地，但大家睇下佢啲飛，四場泥地短途，飛數其實都冇乜異動。反而前一場，隻馬第一次跑谷草千二，隻馬飛數居然勁到不得了。好明顯，賽前已有人知跑谷草千二係應付到嘅。到咗上次，終於落到四班，而飛數亦勁，最終搏輸咗。但亦睇得到，呢隻咁耐未交代嘅馬，上次真係認認真真想同馬主交代。而四班谷草千二因成日拆組，水準亦長期唔會高。今次馬房乖乖地繼續跑四班谷草千二，睇個樣就係想交代下，呢隻咁忠心嘅馬，如果又跑個二二三三，加一分上返班會好麻煩，始終隻馬咁忠心，季尾未必减到一分兩分落返班，到時更難交代，我睇今場方仔會諗盡辦法交代，馬膽我信呢隻。
文匯報
