黃子豐

「勁先生」今季踏入四歲，一出已如飛殺上贏馬，贏完馬後，9月28有四班泥地1200唔報，係都要跑四班田草1400，如果跑馬係純跑獎金，馬房冇必要跑1400唔跑啱啱贏得咁輕鬆嘅泥地短途吧。結果跑三場草地贏唔到，12月尾用潘頓返泥地摶失。還好之後一場，潘頓繼續跑，喺四班1400真係順利補中。交代後的「勁先生」，出爭三班繼續跑1400，最後大敗而回，田泰安落馬時話隻馬動作有問題，差不多收停過終點。按道理，大敗一場後係人都怕，再加上小休兩個月後，初次換一批三班泥地完全唔同嘅對手，須知道三班泥地1200嗰批對手，係「德心知遇」、「假面騎士」、「晶晶日上」、「包裝伯樂」呢批馬，對手再唔係四班那些「良駒好友」、「越野大師」、「寶麗生輝」。

正常嚟計，「勁先生」啱啱大敗，又休息過，對手又一下子轉強咁多，飛數唔應該太強，但四月中復出嘅「勁先生」，其實兩場三班泥地飛數一啲都唔弱，而結果表現都算合格，睇嚟隻馬復出後健康已完全穩定晒，三班泥地亦一樣夠跑，睇下今場可唔可以重開勝門了，馬膽我信呢隻。