【豐力深作】第二場買鐵三角

黃子豐

第二場「手到齊來」今季一直狂減分，搏命出賽，搏命減分，大家睇睇佢喺二班同三班出賽共十一場，除咗兩場叫做有些少飛外，其餘九場次次巨型冷門，根本冇人覺得有機會，其實大前仗初落四班嘅佢一樣係144倍，前仗24倍跑第九，輸七個幾馬位，但上場突然有飛得4倍，結果飛到馬到。擺明有人知隻馬上次狀態嚟咗，現在咁低分，隻馬操番起，睇嚟係時候想交代。

第二匹係初出嘅「渡月橋」，睇番近十年，去到第75個賽日打後，呢類型初出馬跑四班千四，只要初出賠率低於4.4倍飛數嘅，總共有八匹，結果有五W一P成績，反映呢啲質新馬一做夠功夫，季尾出嚟，係想同馬主交代，今次隻馬初出搵到潘頓，賽前試閘一手一腳操足，臨場一見有飛就會搏命。

第三匹係「葳莉非凡」上埸對住兩匹啱啱贏完田草千二嘅「小鳥天堂」同「海藍寶」，點知佢一樣夠膽賭到4倍，質新馬明顯有人追住賭，輸兩次後，今次馬房突然加個眼罩上去，係最大變數，總唔信上兩次嘅飛數係馬迷賭嘅。呢三匹馬臨場睇睇跑道再睇睇飛，搵隻W賭，賽前就買條鐵三角Q先。