黃子豐

「時時歡欣」同「福國寶」同老豆，結合佢本身周身肌肉超早熟，而且競賽哩程唔一定會好長。點解咁講呢，呢個血統，本身已十分早熟，呢啲早熟馬學習能力快，天生速度強，基本上出賽頭五六場，已可跑到本身最高水平，再加上呢隻「時時歡欣」體重近1300磅嘅肉身大馬，唔使問都知，一對前腳負荷會非常大，好容易傷腳，年輕當打時，狀態FIT仲頂得住，銳氣一過，評分轉高，要長期對住強手，狀態稍稍不及時，一對前腳特別容易整親，所以呢類馬，大部份練馬師見到隻馬步入正軌後，大多唔會點玩嘢。

睇返佢初出嘅已經畀人賭到2倍，呢啲初出馬，老實講，馬迷點敢買，買都買隻跑過有賽績嘅。知情人士第一鋪就夠膽大賭，第二次上陣，又重磅又11檔，再一次賭到熱門贏。贏兩場上到三班嘅「時時歡欣」其實飛數一樣超勁，突然大敗，加上賽後馬房立即安排休息，唔使問都知，隻馬當日肯定有事，只係賽後報告乜都冇講，但點都肯定唔係輸能力唔夠跑。今次休後復出搵到潘頓，睇嚟係想趁季尾對手弱，盡量可用則用了，馬膽我信呢隻。