【豐力深作】嘉應奇兵進步中

黃子豐

我今季好早就講，今季嗰三場四班條件賽嗰批BB，實在勁到不得了。你睇番嗰批馬，「錶之宇宙」、「至尊高超」、「嘉應奇兵」、「北地烈馬」、「醒目先駒」、「風雲」、「錶之星河」、「環球英雄」、「加州活力」、「肥仔精神」各有各贏，進度好嘅，就贏上高班，進度普通啲，一樣在低班有交代。

呢隻「嘉應奇兵」，可以喺呢批咁叻嘅對手下贏到兩場，點講都好，佢一定係一匹質素非常唔錯嘅馬，贏咗兩場後，馬房畀隻馬休息咗近四個月，季中後先復出。四月中復出嘅「嘉應奇兵」，升上三班第一場大敗而回，結果輸完後，馬房同佢加個眼罩。而大家必需要留意下佢嘅飛數，初上三班復出跑第一場嘅「嘉應奇兵」，當其時有咁好賽績，居然有22倍，反而大敗後，係人都怕咗佢，加個眼罩又唔知好唔好後，佢643嗰場，居然突然有重飛得嗰六倍，好明顯，賽前已有人知道兩點，第一，隻馬復出大敗嗰場，與馬匹能力無關，第二，呢個眼罩絕對幫到呢匹馬，而結果，初戴眼罩已入位嘅佢，上場已經順利又再補中，三歲馬如日方中，實力都仲未見底，馬膽我信呢隻。