【豐力深作】「寶成智星」硬淨

黃子豐

今期有兩隻三班落四班嘅馬，我覺得有必要吼。第一隻係「爭金奪冠」，呢隻谷草專家對上五次上名，賠率從未高過六倍，好明顯，係一匹馬房判斷得好準，好少爆呔嘅一類馬，絕對可以話係飛到馬到嘅好馬。但大家睇下，呢隻馬今季踏入一月份到而家，有冇一次係有飛嘅？甚至近四場跑番季初仲上緊名嘅三班谷草一哩同千八，一樣一啲飛都冇，擺到明係有人好清楚唔得嘅，而家落咗四班，用到潘頓，呢次有計。

第二隻係同場嘅「寶成智星」，呢隻自購馬，上季插班跑五場，次次八九十倍，甚至二百倍，馬房擺明就係減分，其實今季初幾場，同樣完全冇飛。隻馬之前根本喺馬房心目中，係完全冇水準嘅。直至爆冷贏馬後，「寶成智星」其實再跑四場四班谷草1650米，四場都有飛有表現，可見呢匹馬，今季開始踏入戰鬥穩定期，只係近三場，隻馬升咗上三班先唔夠跑，同狀態冇任何關係，今次重回四班，小心立即變身，大家可諗下買對碰WIN同單Q。