【豐力深作】魅力知福補中

黃子豐

六月廿八號嗰日，有兩匹馬臨場嘅飛數，令我印象相當深刻，而呢兩匹馬，咁啱今次又一齊報咗名出賽，一隻係告東尼隻「美麗星晨」，另一隻係蔡約翰嘅「魅力知福」。

大家如果記得，當日「魅力知福」嗰場，全世界嘅貼士，大部份都有「幸運多彩」、「實力派」，而事實上，當時「幸運多彩」啱啱新鮮熱辣贏完千二，而「實力派」就啱啱喺三班田草千二上完名，落班搵到潘頓。所以呢兩匹馬分別四倍同三倍當然合理，但大家要留意，當時同場全無近績，近三場加埋輸超過18個馬位嘅「魅力知福」，居然得六倍，相比起「幸運多彩」、「實力派」，呢隻馬嗰日實在多飛，結果真係差啲飛到馬到。而當日同一情況，又係重飛博失嘅，仲有呢場告東尼隻「美麗星晨」，大家諗番下，當日呢場有兩匹新勝三班1400嘅「嘉應奇兵」同「喜尊龍」，結果兩匹馬居然行沙圈時都四五倍完全冇飛，反而全無賽績嘅「美麗星晨」啲飛唔知喺邊度嚟，但同「魅力知福」一樣，又真係有飛有表現，依家兩匹當日重飛搏輸馬再出，可以買返條2串3WIN望佢補中。