梁振輝 香港資深出版人

在廣東話中，「篤」另有其意義：

1.「篤」——指

配詞：手指篤篤（1）；指天篤地（2）

示例1：

我個仔兩歲都算識幾多字；你擺張報紙響佢面前，噏幾個字，例如大呀、中呀、火呀、車呀，佢一「篤」就「篤」咗佢出嚟！

示例2：

乖孫，講嘢嗰陣，唔好「手指篤篤」，尤其係對老人家，好冇禮貌㗎！

示例3：

A：我老公近排一時話去打通宵麻雀，一時又話北上傾生意；古古怪怪，不過我都信佢冇嘢！

B：死蠢，擺明「指天篤地」喇！

【「指天篤地」表面是一時指向天，一時指向地；即沒明確的方向，令人無所適從。後泛指亂指方向，比喻某人胡亂地作出反應或說虛話。】

2.「篤」——刺、戳、拮（poke）

配詞：篤魚蛋（3）；篤腐乳（4）；篤眼篤鼻（5）

示例4：

A：我好懷念小學喺街邊「篤魚蛋」！

B：我就好難忘記細個嗰陣好窮，一個禮拜有幾餐「篤腐乳」送白飯啫！

示例5：

A：你「篤眼篤鼻」，即刻響我面前消失！

B：睇耐多少，咁你就會越嚟越順眼㗎喇！

【「篤眼篤鼻」相當於「刺眼刺鼻」，指礙眼或看某人不順眼。】

3.「篤」——捅，（用棍狀物體）觸碰、撞擊

配詞：篤波（6）；篤蜜蜂竇（7）

示例6：

香港人叫「打士碌架」（Snooker）做「打枱波」、「篤波」。

示例7：

A：有包咩響樹上面，揦支棍「篤」佢落嚟睇下！

B：「篤蜜蜂竇」，我走先！

【「篤蜜蜂竇」（捅馬蜂窩）比喻惹禍、引動糾紛或招惹不好惹的人。】

4.「篤」——虛報數字；報大數

配詞：篤出嚟/篤數（8）；篤大條數（9）

示例8：

舊時好多唱片銷售數字都係「篤出嚟/篤數」嘅！

示例9：

聽講呢間公司呢兩年「篤大條數」，就係要搞到盤數靚靚仔，然後申請上市。

5.「篤」——指證；揭發/告發；告密

配詞：篤爆（10）；篤佢出嚟（11）；篤背脊（12）；篤灰（13）

示例10：

你偶像畀人「篤爆」佢結咗婚，連仔都生埋！

【「篤爆」與「踢爆」、「揭老底」意近。】

示例11：

個個話呢單嘢係我做，咁我至「篤佢出嚟」啫！

示例12：

靠「篤背脊」（戳脊梁）上位，上到都唔馨香喇！

示例13：

義字當頭，打死我都唔「篤灰」！

6.「篤」——底、末

配詞：行到篤（14）；抆篤（15） ；打爛砂盆問到篤（16）；打穿葫篤（17）

示例14：

某甲：阿伯，我冇帶屋企鎖匙，開唔到道門；新搬嚟唔知埞，邊度有開鎖佬呀？

阿伯：呢條街去到「篤」/「抆篤」嗰間有！

【「篤」、「抆篤」有盡頭的意思。】

示例15：

做呢條細佬嘅補習先生真係唔係咁易，佢「打爛沙盆問到篤」，有時間都未必識答喇！

【「打爛砂盆問到篤」（打破砂鍋問到底）比喻對事情尋根問底。】

示例16：

今日打牌我一贏三，諗住仲唔威返次；點知最後一圈連包四鋪，「打穿葫篤」，仲嘔凸𠻹！

【「打穿葫篤/打穿壺篤」比喻眼看到手的利益卻被人在最後關頭奪走了好大部分。】

7.「篤」——擬聲詞

配詞：查篤撐（18）；查撐篤撐（19）

「查」、「篤」、「撐」是幾種敲擊樂器所發出的聲音，廣東人用「查篤撐」表示「睇大戲」（看「粵劇」）。後用「查篤撐/查撐篤撐」表示一些有特別意思的搞作，如：撐枱腳；行房；結婚；耀武揚威；大夥兒去消遣；業務發展等等。

示例17：

輝仔我哋三個唔撈嘞，留返你一條友同老細「查篤撐/查撐篤撐」（並肩作戰）喇！

8.「篤」——量詞

配詞：一篤屎（20）【一泡屎】；一篤尿（21）【一泡尿】

9.「其他」

配詞：沙梨篤（22）；姣思扽篤（23）

示例18：

A：我老豆食燒肉至鍾意係「沙梨篤」！

B：嗰忽肉彈牙兼脂肪少，佢都識食嘞！

【「沙梨篤」（沙梨底部）狀似豬屁股。】

示例19：

得嗰13歲女，見到啲花𡃁仔就「姣思扽篤」！

【「姣思扽篤」指在人前顯露媚態以吸引男性。】