【豐力深作】「論文」大勇再鍊

黃子豐

「論文」在英國其實只係跑咗五場，頭四埸都係二二三三贏唔到馬，到咗第五次出賽，贏咗大不列顛錦標，你話呢埸大不列顛錦標水準點都好，點講都唔會低過香港嘅四班吧，何況當其時莫雅肯跑，點講隻馬質素都唔會點差。

可惜自購馬第一季來到香港本身就未適應到水土，跑跑下仲傷埋右前腿。結果「論文」第二季轉咗去富全度，轉倉後本來好地地，點知搏咗兩埸又傷，最後24年2月同5月連獸醫檢驗都過唔到。今季「論文」又轉咗去徐雨石度，你乜都唔使睇，淨係睇隻馬由11月起，到而家跑咗十一場，咁嘅出賽頻率，就知隻馬係來港後，健康最好嘅時候，其實呢匹傷患馬，嚟香港後跑咗八場谷草，有六場入到前四名，隻馬喺快活谷呢種冇咁硬嘅場地，擺到明開步係開得好舒服，唔怕腳痛，高質傷患馬難得健康好，跑番快活谷又抽個好檔，我就睇唔到佢有唔搏嘅理由，而且本身長期冇乜星味，賠率唔會好熱，馬膽我信呢隻。