黃子豐

季尾點講都要集中吼實啲未交代嘅馬。始終馬主養馬蝕本冇乜所謂，但想贏番場，影番張相威吓，咁都唔得，點講都會好失望，再係咁，暑假一個屈尾十轉埋馬房，實在冇幾出奇。

今期先講隻「志滿同行」，呢隻自購馬初跑快活谷嗰場突然有飛，睇嚟係有人覺得佢谷草千二特別好，但呢場摶輸後，飛數越來越冷落，我睇幕後搏輸後，應該覺得隻馬三班根本唔超，就係把心一橫等落四班，而家落班搵到潘頓，好似想交代。另一隻「電訊驕陽」出道初期根本次次係巨型冷門，馬房好明顯知道隻馬係完全未得嘅。直至今季218場突然有飛變12倍，到而家跑咗八場，其實得兩場冇獎金，四歲自購馬來港初期刻意減分，今季明顯已到咗大熟期，或者呢隻馬質素未必好高，但而家不斷拆組嘅四班谷草千二，水準其實唔一定高過五班，未交代嘅路程專家單係跑份四歲銳氣，路程性能同檔位，喺呢組已夠爭勝，講穩定性，佢可能比「志滿同行」仲要穩定。