黃子豐

我認為呢隻「競駿輝煌」，點講季尾都應該仲有一場頭馬。大家諗諗，呢匹馬季初一直有人追住賭，結果輸下一場又一場。季初三場輸到冇影後，馬房第四場同佢加個耳塞，結果又繼續賭，又繼續輸。

輸完之後，阿蔡又同「競駿輝煌」加個眼罩，呢鋪仲買到唔夠兩倍，最後仲輸到影都冇，按道理，乜配件都加過，潘頓又騎兩場摶過命，左搞右搞，二月份之前，隻馬熱就係熱咗好多次，但其實只跑過一次第二，其餘連近都唔近。咁嘅馬，對上兩場冇換配件，冇換路程，只係大哥潘頓唔跑，按道理點計隻馬啲飛都應該係走晒至啱，但事實並唔係咁，換上艾道拿繼續跑番上次潘頓輸到冇影嘅千四，繼續用番上次輸到冇影嗰個眼罩下，隻馬居然得三倍，你話呢啲飛係馬迷買嘅，搵鬼信咩。好明顯，隻馬經過左試右試後，而家已試到準晒，呢類馬一般未贏時，個個追，贏咗後就開始冇人追，越贏越好分，依家才真正步入正軌嘅「競駿輝煌」，而家應該先開始步入大熟大勇之時，今日馬膽我信呢隻。