黃子豐

「五福星」確確實實唔系一匹質素好高嘅馬，你睇佢上季，四場可以跑入前五名，攞到獎金嘅賽事，全部都係抽到內檔，而另外四場抽十檔以外嘅賽事，就跑到影都冇。反映呢匹馬，一般係要等其他對手搵咗位，而佢又相對賺咗腳程，一來一回，佢嘅名次先可以提升。

今季嚴格嚟講，「五福星」都試過跑最弱嘅四班快活谷千二，而且好好彩咁抽咗幾次內檔，但最叻都只係近。但令到筆者最唔明嘅，係呢匹馬，單係講今季已經輸咗咁多場，不過大前仗初跑泥地，居然都仲係得六倍。而結果居然又真係飛到馬到跑得好。隔咗一場十二檔大敗後，上一場，飛數又反哂來，結果又繼續跑得好。按道理，最起碼證明隻馬近期其實演出已經穩定咗。點樣講都好，佢始終喺四班草地拿過八次獎金。呢啲未交代嘅馬，羅富全絕對唔會玩嘢，我睇馬房左計右計，隻馬落咗五班，對手始終係弱咗好多嘅，快活谷佢又唔係唔得，未交代馬唔似刻意求輸。