黃子豐

梁家俊隻私家馬「遨遊武士」有幾多料，佢應該係最清楚了。在連騎七場後，今季初，初次上二班，梁家俊居然肯放棄，揀騎咗隻「手機錶霸」，要知道當時，「遨遊武士」啱啱贏完場三班1600，反而隻「手機錶霸」當時上二班後連輸兩場，又仲未贏過1600，而且梁家俊係騎都未騎過「手機錶霸」嘅。但事後睇，「手機錶霸」真係跑到「遨遊武士」近都冇得近。

睇嚟「遨遊武士」上到二班後，係真係唔見得好超。其後隻馬落三班搵潘頓輸一場輸到冇影，大前仗家俊騎番，在冇甚大錯表現下，再一次演出失望到不得了，前一場馬房可能實在覺得太過失望下，加個眼罩試下，結果慢放下跑回一席第四其實表現非常一般。滿以為呢隻「遨遊武士」係一匹早熟早殘嘅馬時，上場在冇任何配件變動下，居然見飛數又變強勁，結果在臨場落雨，段段快開下，居然又再突然跑番出水準。睇嚟之前幾埸敗仗，隻馬係出過多少問題，非賽績睇得到嘅，否則前一場飛數已全走嘅佢，上場有乜理由突然飛數返晒嚟，且段段被狂燒下，演出又突然轉勁。我睇今次跑返乾快地嘅「遨遊武士」，應可補中。