黃子豐

當年我離開電視台，係同班職業賭徒做嘢，近年部份賭馬集團覺得冇著數，慢慢退出咗香港馬圈，有部份試行去日本賭，但以我所知，日本彩池唔夠大，最後亦離咗場。以我跟咗啲職業人士咁多年，佢哋主要做嘅嘢，並唔一定係針住啲冷門賭。事實上，只要係計出嚟佢哋認為合理，一樣唔放過。

你睇早前「陽光勇士」、「騰龍四海」、「跨境寶馬」最後入閘後一注六百萬，一注過千萬投注，呢啲並非馬迷嘅注碼。好似我講過嘅「時時歡欣」及「快靚旺」呢啲PPG，呢啲馬早就喺國外試到準一準，職業集團早就在隔晚彩池先放三兩萬，長期把其賠率壓低到兩倍，馬迷見到一隻跑都未跑過嘅馬，好自然將目標放喺同場其他十倍八倍馬度，咁佢哋就同你對賭，彩池有幾大，佢哋就睇住彩池落注同你對賭，一賠一，以我認知，佢哋從來覺得賭馬好過賭大細。馬迷估估吓，唔敢賭熱門好正常，因為命中率唔高，唯有撞冷門。但好似「時時歡欣」上場，又轉路程又重磅又外檔，馬迷當然又唔敢賭，結果照贏，好明顯呢隻馬早在人哋心目中，喺三班一定夠嘅，而家上到嚟三班，改負輕磅，我睇都仲未見底。