黃子豐

成日講馬房動態，就係當日馬房搏幾多隻馬。點解馬迷成日會關注呢個情況，原因好簡單，因為馬迷賭馬賭咗咁多年，呢啲情況已見慣不怪。好多人到今日都唔信，馬嘅狀態係要谷嘅，事實上，馬嘅實力咁緊湊，狀態好少少，咁名次就會差天共地。當馬房有心出擊那天，狀態自然谷到應一應，而當日騎師又唔發夢，咁就自然唔同曬。但相反，當馬房唔太認真，咁第一，冇理由賽前會傻到將隻準備減分嘅馬谷到應一應，更加冇理由傻到叫騎師走位要十分精絕，盡量同我跑到一百分，如果有個咁嘅練馬師，咁佢都算蠢到加零一了。

隻馬想减分，自必然七八成馬去跑，騎師就叫佢執生囉，反正你信唔信個騎師會唔知你隻馬想減分？馬迷諗通呢點，就會諗通好多嘢。3月2號的賽日，文家良出六隻馬，其中「潮州精神」又輸咗，「閃耀威龍」又冇埋。如果當日馬房係大舉搏殺嘅話，咁文家良判斷都幾一般。但我哋睇咁多年馬，文家良又點會咁水。好明顯，馬房當日唔係出擊嘅一日，如果係咁，呢隻初出都跑得咁好嘅「金金小子」就唔係講笑咯，呢隻三歲仔，睇嚟真係有多少質素。