梁振輝 香港資深出版人
第一節（公園）
輝仔：約咗婷婷喺「邊恕」（邊處）等呀？
為為：前面公園仔，行快兩步喇，婷婷唔鍾意人遲到㗎！
婷婷：芙蓉如面柳如眉，對此如何不淚垂……芙蓉如面柳如眉，對此如何不淚垂……
輝仔：嘩嘩嘩，婷婷好嘢噃，唐代白居易嘅《長恨歌》都識得唸返兩句，有料到，有料到！
婷婷：冇呀！有人話「雲吞麵」之所以叫「細擁」係同呢句詩有關嘅，咁咪唸返佢幾轉，睇下有乜發現囉，不過都係諗唔通！
為為：有關咩？真「抓頭」！（「抓」讀「拗3-1」，摸不着頭腦）
輝仔：嗱，前面嗰間雲吞麵舖係老字號，嗰度可能有人答到你！
婷婷：講落有啲肚餓，順便過去整返碗先！
第二節（雲吞麵舖）
輝仔：我同班friend嚟過，聽到有人話嗰個伙記係三朝元老，由廣州老舖做到落嚟香港，問佢冇「走雞」（「走」失「機」會，即落空）喇啩！
為為：師傅，三碗「細擁」。
師傅：收到！
婷婷：師傅，聽講呢度你最老資格，我哋想問下點解會叫「雲吞麵」做「細擁」㗎？
師傅：等我落埋呢張單至過嚟同你哋慢慢傾。
為為：阻住你，唔好意思呀！
師傅：唔阻、唔阻！
輝仔：其實你問嘅嘢喺Wiki應該查到，使「唔使」問人呀？
為為：咁咪撳入去囉，睇下點講都好呀！
師傅：三位，你哋真係冇搵錯人！「細擁」，「細擁」，要由個「細」字講起。
婷婷：會唔會係「大中細」個「細」？
師傅：醒目！
輝仔：咁點分㗎？
師傅：「細」嘅一碗有生麵4両同4粒雲吞，「中」就有生麵6両同6粒雲吞，「大」就即係兩碗「細」嘅。舊時，啲人唔當「雲吞麵」係正餐，想過下口癮又唔想食咁多，所以至有分量之分。講到個「擁」字……
輝仔：大家等等，我「啱啱」（剛剛）撳入去Wiki，裏面好似唔係咁話過喎！
師傅：咁讀嚟聽聽。
輝仔：據說早期的雲吞麵比較小即是「細」，係咪想話雲吞麵嘅分量比較少呀？冬天時低下階層把小碗「擁」在懷裏，既飽肚又取暖，故稱「細擁」。
為為：咁都得？
婷婷：Wiki、百度呢啲自由百科，人人都上得去寫，文法錯「唔在講」（源自「唔再講」），所謂根據就係根據咗啲冇根據嘅嘢，所以唔一定啱嘅，唔好信晒！
師傅：應該唔係嗰回事。我入行嗰陣，都有問過呢個問題，我師傅話係同「芙蓉如面柳如眉」呢句詩有關嘅。
婷婷：嗱嗱嗱，我都話㗎喇！
輝仔：「叻唔切」（來不及認聰明）！
師傅：答案就係「匿」（口語讀「利6-1」）喺「芙蓉如面」嗰度。呢四個字即係話「芙蓉」就係「面」。簡單啲講，「蓉」就係「面」，而「面孔」個「面」同「麵條」個「麵」同音。就係咁，有人就用咗「蓉」字做「雲吞麵」嘅暗語嘞。
為為：「細」指分量、「蓉」指麵，咁「雲吞」呢？
輝仔：係噃，你叫「細蓉」，啲人會唔會以為你叫「細碗淨麵」㗎？
師傅：呢層冇有擔心，舊時啲雲吞麵舖，獨沽一味，淨係賣雲吞麵。
婷婷：入得嚟梗係食雲吞麵，唔會食淨麵嘅！
師傅：咁「雲吞」兩個字咪可以慳返囉！
為為：咁點解個「蓉」字又讀咗個「擁」字㗎？
輝仔：「蓉」同「擁」個音差唔多。
師傅：所以讀下讀下，咪讀咗「擁」囉！
婷婷：翁、擁、jung3、蓉、勇、用，變咗調吖嗎！本來係第4個，而家變咗第2個。
為為：嘩嘩嘩，婷婷真係唔係普通叻噃！
婷婷：學過下「粵語拼音」咁喇！
輝仔：咦，餐牌度淨係得「雲吞麵」，冇你講嗰啲「細蓉」、「中蓉」同「大蓉」噃！
師傅：而家冇分嘞，「細蓉」就係指「雲吞麵」。
婷婷：明晒兼唔該晒。
師傅：唔使客氣。
看過劇場中雲吞麵舖師傅的陳述，筆者相信大家已接受Wiki中對雲吞麵叫「細蓉」的來源有誤的講法，且認定「細蓉」乃源自唐詩的陳述。後者的說法引經據典，再加上有不少所謂粵語專家、專欄作家、中文人附和，就算是假也變成真了！筆者不止一次在此欄指出廣東話的用語和用詞大多不是從「典故」而來，而是從「音變」而來。其實上述講法也有涉及音變，不過是用了個錯字來變。據筆者考究，正確是「用」字。「用」指食用；在雲吞舖食用的當然是雲吞麵，所以以「用」作為雲吞麵的短語適合不過。「用」音變作「擁」，就有「細擁」這個講法。寫時以「細蓉」代「細用」是給它個雅號而已。原來真理不是看說的人是什麼身分，而是看說的人可否拿出確切的理據來。
0
已點過讚
0 / 255