太遲獲悉梅艷芳尋親遺願 梅姐姨甥潘文皓深感難過

香港文匯報訊 港台《舊日的足跡》主持車淑梅近日請來電影《梅艷芳》導演梁樂民作客，並親解梅艷芳歌迷對其電影製作的提問。淑梅姐更成功隔空訪問到梅艷芳大姨甥潘文皓。

曾獲「香港電影金像獎」最佳編劇和最佳導演的梁樂民本身是梅艷芳歌迷，也因電影公司老闆江志強的緣故而開拍電影《梅艷芳》。電影上映後，梅艷芳的歌迷對梁導演有三問，為什麼要將（電影中的）日本歌手「洗白」？梁樂民表示：「我相信佢（那日本歌手）係梅姐心中嘅初戀。喺女孩子嘅眼中，初戀情人唔會係壞嘅，或者有一啲事佢（梅姐）唔想知，甚至唔想被記錄……多謝（電影公司）老闆負責知會咗日本歌手，片中唔講佢全名就是出於對佢嘅尊重。」

至於為什麼梅姐為姐姐結婚而跟姐姐吵架？梁導演：「因為嗰個年代姐姐出嫁就等如失去咗一個相依為命、可以倚靠嘅親人，相信佢（梅姐）本人都唔願意向大家表達嗰種不捨嘅心情。」

最後，梅姐一早已經宣布不領獎，她應該不會為「最受歡迎女歌手」獎項而不安。梁導演：「我哋只係設計一個機會，等梅姐講述自己並非為後浪趕上而轉向（參與）公益事務，佢嘅出發點對得起天地良心。」

另外，與梅艷芳失聯21年的梅愛芳長子潘文皓，日前在社交平台表示他已在電影院看了《梅艷芳》，並在帖文中抒發了感受。淑梅姐成功透過長途電話訪問身在加拿大的文皓。

潘文皓表示：「其實六年級開始就喺呢邊生活！當我知道有呢套電影，我一定要睇，裏面一定會講好多有關媽咪同姨姨嘅事，爹哋、細佬都有睇……印象中，媽咪（梅愛芳）係一個好稱職嘅媽咪，好畀心機教我同細佬。佢係一個好積極樂觀嘅人，遇到乜嘢難題都係笑住面對， 正如電影情節一樣。姨姨係一個好直、好有為、好堅強嘅人，佢好鍾意講笑令身邊人開心，時時刻刻為人哋設想。細個嗰時我有少少驚佢，因為佢把聲好有力量同埋威嚴，有冇畀佢鬧過我唔記得，但係我真係有少少驚佢，我知道佢係大明星，佢係個永不放棄嘅人，電影中佢話『只要有信心、世上無難事！』呢一句正正喺佢用生命話畀我哋聽。」

完成大學 感激姨姨教學基金

淑梅姐：「你知道姨姨一直搵你哋嗎？」

潘文皓：「我只係呢一排先知道……當年我哋唔喺香港，唔知佢搵我哋，如果知道，爹哋一定會帶我同細佬返嚟見佢，所以當我知道佢一直有心搵我哋，亦係佢臨終前一個心願，我真係覺得好難過。我家大個咗，可以幫佢完成心願，即係佢可以搵番我哋喇！其實呢兩三年，我有同姨姨嘅Fans聯繫返先至知道有呢套電影，我先至知道有呢一件事，係佢哋話畀我知……」

潘文皓談及近況：「我28歲，有女朋友未結婚，我家做IT工作。細佬都好好，佢都係做IT電影後期嘅工作。爹哋好好，身體好好，好健康。我都想返香港，如果可以，我嚟緊呢半年內會返，上次2017年返過嚟，今次我會探婆婆，佢98歲，我好想返去見佢。」他又表示會睇（《梅艷芳》）第四次， 隔幾日睇一次，直到落畫，因為每一次都有唔同感受。

淑梅姐：「有咩要對媽咪同姨姨承諾？」

潘文皓：「就係我要好好成長，好似佢哋咁對自己同對身邊嘅人……姨姨講過希望有一晚，大家食完飯出去望住星星嘅時候，會記得佢，一個曾經為我哋帶來小小歡樂嘅朋友，會記住佢個名叫做梅艷芳，我會一路一路記住佢哋，永遠永遠以佢哋為榮！」文皓又特別補充：「其實我同細佬好想多謝姨姨留畀我哋嘅教學基金，等我哋可以順利讀完大學，家有一份幾好嘅工作。」

淑梅姐表示，年輕人能飲水思源，十分難得。