【貴圈真亂】搣時潘赴台着草丟低「手足」

揚言當地買樓開貓cafe 累同案被告要交出護照

有時候真係覺得睇黃圈精彩過睇小說。攬炒派前區議員劉家衡個老婆「搣時潘」潘書韻早排仲喺度籌緊律師費，應付自己涉嫌襲擊市民嘅案件，籌到幾多錢就唔知，但肯定唔係用嚟打官司，皆因噚日開庭嗰陣佢唔見咗人，丟低「手足」前議員秘書李譯喬一個喺法庭自己面對，仲累到「手足」要交出所有旅遊證件先畀保釋。之後上網睇返先知，原來「搣時潘」喺最後一秒先同同案「手足」講走咗佬去台灣，仲要出埋post話會喺台灣買樓發展同開貓cafe，件事俾網民圍插，引來更多相關人等爆料。●香港文匯報記者 藍松山

「搣時潘」老公劉家衡，喺早兩日先至辭去區議員職務。噚日係「搣時潘」被控傷人及刑毀提堂，原定9點半開庭，但「搣時潘」同佢嘅代表大律師梁麗幗都冇出現，當時大家都估佢係着草。法庭於是通緝「搣時潘」，同時要求到庭嘅第二被告李譯喬交出所有旅遊證件、不得離開香港、每星期警署報到三次、更改住址須通知警方，先畀佢保釋。

走咗佬連「手足」都唔知

自稱係「搣時潘」同事「家屬」、懷疑係李譯喬女友嘅「Ting Lok Yee」噚日下晝就喺facebook發帖爆料，先話「搣時潘」同佢個前區議員老公劉家衡一直「辦公室欺凌」，「我都算，你做得出臨上庭前嗰晚先知會自己著（着）咗草，拋棄為你賣命嘅同案『手足』，由佢喺香港自生自滅。」「『屎』路比」繼續爆料：「今日佢個（前）議助係自己比（畀）5k（5,000蚊）保釋金。」

之後，連登討論區都有個叫「阿風」嘅網民出post，踢爆「搣時潘」唔聲唔聲着草，但劉家衡連搵個律師幫返自己前員工都冇，直言︰「做『潘鳳夫妻』議助要包坐監，慘過食屎。」「Honda Ho」就話：「走咪走囉，之後重要（仲要）打鑼打鼓咁，攪（搞）到其他『手足』連護照都比（俾）人收埋。」

有人就話喺件案開審前，「搣時潘」在網上表示法律開支大，要籌錢。當時，已經有唔少人質疑佢間性商店有成4間舖都仲要籌。喺佢疑似潛逃後，呢啲以應付法律開支名義籌到嘅錢，就梗係「財到光棍手」啦。最「正」嘅係，「搣時潘」火速在patreon開設所謂「旅行寫真流亡日記」計劃，仲要月費50美元，後來可能俾人圍攻而改咗名。

專頁揭「搣時潘」有錢仲叫人課金

fb專頁「本小姐」仲cap低一段疑似係「搣時潘」嘅網帖，大意係話自己「經濟能力一早可以移民」，仲話自己之前喺香港同大家「共渡時艱」係「蠢」，又話自己「唔再講政治嘢」，「我會去台灣買樓發展，去台灣出寫真，去台灣開貓cafe，再見啦。」

fb專頁「本小姐」出post揶揄佢︰「好威呀，眾籌一筆之後『流亡』去台灣出寫真開貓cafe唔講政治嘢，掉低個同案手足連律師都冇個。」「本小姐」其後再喺個post度加「一早有錢」「係你哋要課」等hashtag（標籤）去二次傷害班黃色水魚。攬炒分子所謂嘅「齊上齊落」，你唔係真係信啩？