喺香港修例風波期間，台灣當局領導人蔡英文等不斷為暴徒吶喊助威，助長佢哋嘅氣焰，但正如香港黃絲自己都講，「『手足』不過係condom。」兩個舊年潛逃去台灣嘅香港暴徒，喺當地做咩都處處碰壁，向傳媒質疑蔡英文「冇兌現承諾」，又話自己有被遺棄嘅感覺喎。包括台灣網民在內，唔少人都揶揄佢哋咎由自取，更有人鬧佢哋「抹黑台灣」，真係兩面不是人。
埋怨開工要證件冇特權
喺前年參加過「佔領理大」、今年18歲嘅Kristy（化名），近日喺接受「德國之聲」訪問時話自己因為怕被拘捕，喺舊年9月入讀咗台灣嘅大學，但佢嘅特區護照出年夏天就會過期，但就唔敢返香港換，隨時變成「無證人士」：「除了即將失去出入境自由，我連留在台灣繼續生活也有困難，因為以後找工作、結婚、申請居留，每一關都要有護照。而且台灣行政手續官僚、死板，不能補交其他文件作替代，公務員會建議你回港補辦，但我根本不能回去！」
Kristy曾就護照問題向「陸委會」專為「幫」呢班人而成立嘅「台港服務交流辦公室」求助，但對方就話愛莫能助，叫佢「多等幾年」，等未來更多同類求助個案先可以畀政府壓力去處理喎，令佢感到「無奈」同「彷徨」。
「（台方）吸引了香港人才過來但沒有下文，沒想過後續怎麼協助和跟進……我也不想承認香港抗爭者變成了蔡英文的政治手段、籌碼，但這是我的真實感受，有點被遺棄感覺。當初蔡英文的選舉宣傳片有香港的抗爭，一部分票源是來自香港因素，但她有沒有兌現承諾？」佢話。
竟走後門入學 絕望話冇自主
另一個喺舊年參與過「抗爭」之後走佬去台灣「讀書」嘅「生理鹽水」亦呻，自己到台灣時第二個月開始找學校，但因為冇「居留身份」而申請唔到學校，而無法就學又無從取得「居留證」。喺呢段期間，佢買唔到電話卡、考唔到駕照，租房都要搵人代簽租約，更無法打工幫補生計，令佢感到無助。等咗一年半，佢先循「不便透露」嘅的「特別途徑」申請到入學，取得學生簽註及「居留證」。
佢話，自己喺台灣享有自由，但冇自主，令佢終日鬱鬱寡歡，感到絕望，而佢喺台灣學校內遭同學排擠，即使情緒困擾都唔願意求助，「讀完四年書還要在這裏工作幾年才有機會拿到身份，但這不是我想要的生活」云云。
●香港文匯報記者 鄭治祖
0
已點過讚
0 / 255