「龍門」扮執笠劏客 阿姐踢爆「假告急」

知名「黃店」龍門冰室執完一間又一間，繼銅鑼灣分店執笠後，「龍門」老細張俊傑近日再宣布荃灣分店都正式拉閘。唔少黃絲都十分不捨「龍門」收檔，紛紛應張俊傑要求蜂擁去幫襯。不過，近日就有連登仔分享喺「龍門」嘅用餐體驗，直指「龍門」收貴價兼踢爆佢疑似假告急，搞到班一向不願接受真相嘅「龍粉」都幫唔落。

網民「愛或情借來填一晚」就分享，因為喺fb見到「龍門」告急，老闆張俊傑講到又執達吏又剩咁，於是就即刻「打手mode」上身，滿心歡喜咁趁住五天復活節長假期，約埋「女神」一齊去幫襯。

兩個人喺正常晚飯時間7點半去到「龍門」，「女神」嗌咗幾次自己想食嘅嘢都賣晒，自己原本想食價值88蚊嘅梅菜蒸鯇魚，侍應都話賣晒，就叫佢加多50蚊轉食鯧魚，咁喺無辦法之下咪唯有焗住食囉。不過，咁大間餐廳乜都無，真係搞到人相當無癮，「愛或情借來填一晚」就唯有安慰「女神」話：「人地（哋）就執笠，餐牌唔齊好正常。」

點知「愛或情借來填一晚」為「龍門」拆嘅彈就唔只呢個。佢哋等咗成個鐘，搞到胃都痛埋都仲未有嘢食上枱，最終喺三催四請之下，侍應終於喺9點20分拎條魚出嚟，之但係一向俾人投訴多甩漏嘅「龍門」，送得條魚上嚟又唔跟餐送埋個白飯，佢要一追再追，但估唔到原本跟餐送嘅白飯，侍應竟然會出張新單收錢，「白飯係套餐包嫁（㗎）喎，……佢都收多左（咗）我錢，懶得拗喇（啦），當小費。」

前前後後夾埋成兩個幾鐘先食完餐飯，「愛或情借來填一晚」都唔好意思咁話要「女神」望住佢食到10點。成餐飯都本住「龍門」就快執笠嘅心情唔計較咁去支持，但結果當賣（埋）單時，餐廳阿姐就同佢講：「多謝晒！下次再黎（嚟）幫襯。」

「女神」就即刻驚訝咁問：「fb唔係話4月1（號）執笠咩？」

估唔到阿姐呢個時候就唔覺意踢爆：「冇生意先執嘛，而（）家有你地（哋）支持咪繼續囉，記得多啲黎（嚟）喇！」

黃立鯧賣138蚊 網民譏「水魚價」

對於「龍門」咁樣做生意法，唔少網民都批評，有人指「龍門」一條黃立鯧都賣成138蚊，就俾「世一迪列治」嘲諷：「水魚價差唔多！」

「DJCola」建議：「衰完一穫（鑊）又一穫（鑊），不如真係執（笠）啦！」

●香港文匯報記者 倪思言