所謂「物離鄉貴，人離鄉賤」，真係為計劃通過BNO護照去英國班人捏把汗。英方嘅消息啱啱一出，就有好多英國人喺網上表明唔歡迎佢哋嚟。其實英國如今新冠疫情爆到七彩、經濟下滑，而且當地長期都有抵制移民嘅組織，就算係精英移民都會俾鬧搶咗本地人嘅工作機會，持BNO護照移民嘅港人，擺明生活唔會好過嚕。

BNO「5+1」移民政策出咗後，許多英國人亦唔滿意。許多當地網民喺BBC介紹相關移民政策嘅facebook帖文下抵制該政策。網民「Dave Bud Hughes」嘅回應獲得最高讚，佢揶揄道：「很高興我哋有很多閒錢嚟照顧全世界的人，也許政府現在可以多派些養老金，多幫啲殘疾人。」「Tiffany Paul」就更加直白，佢話唔好再畀任何人進入英國，英國已經人口過剩，「我哋要照顧自己嘅人民。」

歷來主張縮減移民接納量嘅組織「英國移民觀察（Migration Watch UK）」，亦曾公開話BNO「5+1」移民政策「欠考慮」，而且激增的移民必將對英國教育、醫療保健、住房和交通系統造成壓力。英國經濟與社會國家研究所（NIESR）更直接鼓勵香港移民遠離大城市定居，以緩解英國中心城市嘅壓力。

牛津大學嘅移民問題專家羅伯．麥克尼爾亦話，突然到來嘅大規模移民將會給英國公共服務體系帶來衝擊，進而激起當地民眾的反感。佢又話，疫情期間英國失業率升高，香港高質素嘅移民短期內亦會給就業市場造成壓力。

易遭侮辱襲擊 租樓更艱難

其實，英國一直都有「歧視」嘅「傳統」，英格蘭人會嘲笑威爾士人嘅口音，少數族裔喺英國嘅日子亦唔係咁好過。新冠疫情之後，自爆喺英國飽受歧視嘅華人通街都係，甚至有被襲擊嘅危險。

facebook專頁「英格蘭中部全職煮婦」日前亦話，佢同表姊妹行街時俾白人女人罵，話佢哋將病毒帶嚟英國，叫佢哋返去自己國家咁。但已移民一段時間嘅佢，又話呢啲情況都係要識自己處理，唔好次次都要「求安慰」𠻹。

舊年3月，喺英國留學的新加坡男仔Jonathan Mok，亦喺facebook發帖話自己喺人來人往、非常繁忙嘅倫敦牛津街（Oxford Street）俾數名英國青年襲擊，更罵佢係「Coronavirus」。

日常生活中嘅「隱性歧視」亦唔少見，見工時面試官對白人熱情，對華人冷淡；非永久居民喺英國亦好難租樓，有人更試過連睇十間樓都被業主拒租，有人話連睇樓嘅機會都冇，甚至肯一次過畀晒一年租金，同樣被拒絕。

●香港文匯報記者 杜思文