陳家樂透露參演電影《一九七一》挑戰全新舞蹈角色

香港文匯報訊（記者 梁靜儀）陳家樂今日（28日）出席保健產品活動，即將踏入40歲的家樂，每年都會定期做身體檢查。家樂表示現在人大了會更注重養生，尤其是決定要生小朋友之前，就覺得一定要顧好自己，先至可以有能力去照顧屋企人。他指因為年輕時捱夜多，雖然現時都頂到，不過就要用好多時間去回復，回復完都覺得好傷。現時他除了肝之外還有腎：「因為我之前有試過生腎結石，都有食一啲保健品嘅，我腰就OK。」

提到他有份參與拍攝電影《一九七一》，家樂指自己戲份已經完成，但未有透露太多，只能講角色是有別以往，前所未見：「我個角色有特長係跳舞，事前都訓練咗一段時間，因為跳舞係人生嘅弱項，事前有同陳太（連詩雅）一齊去學跳舞同拉筋。」

他笑言拉筋過程並不浪漫反而好痛苦，因為要太太和老師一人撳住一條腿來拉筋，問到現在是否已做到一字馬？他笑說：「梗係唔得！」他又指太太好奇怪，為什麼一些容易做到的動作他卻要出盡九牛二虎之力才做到，幸好有老師講解男女的生理結構是不一樣的。

另外，連詩雅近日為《中年好聲音4》擔任嘉賓，不過網民的焦點卻落在她的長腿上，家樂笑言都不是唔好的事，因老婆有聲色藝，問他最欣賞老婆哪一方面？他即笑指是「內涵」：「我都好鍾意佢唱歌，真係有比較就有傷害，我唱歌個女唔聽，但媽咪唱歌就聽，其實我都唔差，可能媽咪一直陀住佢，所以有特別感覺。」