佘詩曼蔣祖曼三搭合作拍廣 老友聚頭夠晒開心

香港文匯報訊（記者 子棠）視后佘詩曼（阿佘）、蔣祖曼（Joman）及張繼聰（阿聰）最近拍攝健康產品廣告。廣告中阿佘飾演自信滿滿的時裝設計師，名牌上身加上女王氣場，霸氣得來又有許多「生鬼」表情，相當搞笑；而阿聰和Joman則飾演阿佘下屬，在默契十足的節奏，配合以真實搭建辦公室場景拍攝，令整個廣告相當有「喜感」。

三人大讚製作團隊認真，令廣告得以在輕鬆又專業環境下完成。談到今次的廣告拍攝，阿佘認為時機剛好：「這兩年間接了兩三齣劇集，近期都要休息下等下好劇本先，所以難得接拍廣告都有角色去演滿足下，以時裝設計師設定，我覺得幾有新鮮感，個造型我都幾鍾意。」阿佘又表示很開心有機會跟阿聰和Joman再合作：「難得三個一齊拍廣告好開心，因為過往廣告，大部分都係自己一個，有好拍檔做對手去交流，個效果出嚟又有另一種感覺，整個拍攝過程好愉快好順利。」

而阿聰談到跟阿佘和Joman合作非常良好：「大家都認識拍攝時特別開心，好快完成咗導演嘅要求，私底下又可以傾吓偈聚吓舊，真係好正。」Joman就大讚同阿佘和阿聰拍檔氣氛相當好，因兩人都是相當優秀的演員，她跟阿聰相識多年，可惜合作機會不多，「對上一次同阿聰合作已經係好多年前嘅舞台劇，佢好有才華，無論唱歌同演戲都係一流，可以喺咁多年之後合作，真係非常高興。」至於能跟阿佘第3度合作，Joman就分外興奮，「我同阿佘之前合作咗兩套劇，今次係我哋三搭合作，冇諗過唔係拍戲係拍廣告，佢同拍劇時一樣好專業表演力極強，觀眾睇開阿佘做嘅角色都係好正經，其實佢私底下同個廣告一樣，係好過癮同好搞笑，大家都公認阿佘無論係劇集同廣告都係女王，我每次有機會同佢合作都係好大嘅榮幸，希望我哋之後可以有更多搭檔機會。」