蕭正楠沖奶誤「加料」 陳展鵬湊B樂在其中

香港文匯報訊（記者 梁靜儀）TVB全新綜藝《夫妻肺片》昨晚一集，四位主持與陳展鵬、周志康、雨僑、賴慰玲分成男女子組對談，大談升呢父親後「男人的感慨」及「豬隊友現形記」，笑料與溫情滿滿。

男子組一開場即大吐苦水，直言當爸爸後在老婆心中地位變低。周志康自爆外出工作時，被老婆無視兩日，更試過被趕出廳。展鵬則笑指婚後「電話愈來愈多」，曹永廉踢爆蕭正楠（阿蕭）升呢父親後，一有空檔就會和老婆黃翠如、兒子「蕭哈哈」視像，阿廉：「佢會係咁喺度哈哈哈。」

阿蕭坦言初為人父時，兼顧工作、湊B及太太情緒，疲憊不堪，曾因精神不佳竟大懵拿錯大Size奶粉殼，意外為囝囝「加料」。當時囝囝飲第一啖後疑惑地望着他。每次沖完奶翠如都會問返「操作程序」，問「係咪嗰個殼呀？」阿蕭才猛然醒覺：「咦？唔係喎！」他坦言當下非常驚慌，但未有即時坦白，過了幾日才敢向老婆黃翠如「自首」，並承諾不會再犯錯了。

展鵬憶述當年拍《鐵拳英雄》時，太太單文柔剛生完女兒。有天他凌晨四五點回家強撐睡意幫手湊女，本想用學過的技巧幫BB包巾，卻因「塊布短咗」折騰到朝早七八點。他坦言當爸後Me time近乎絕跡，但不覺犧牲，反而樂在其中。

雨僑指與羅力威結婚「中伏」

女子組方面，羅力威再被雨僑大爆「豬隊友事件簿」，令身處現場的他極尷尬，只能以笑遮醜。雨僑直指與羅力威結婚是「中晒伏」兼「錯晒」，指對方照顧女兒時束手無策，試過沖涼出來見女兒「大字型」攤在地上狂喊，羅力威卻坐旁邊玩手機，笑言連羅媽媽都曾被羅力威的「豬隊友」行為嚇窒。賴慰玲則大讚老公是「神隊友」，兩位小朋友一歲前均由老公包辦沖涼，認真靠譜。

談及「四大長老」時，展鵬自揭小時候因曳常被打到雙腳開花：「我記得小學着短褲，成隻腳都係交叉，幾尷尬呀！」阿蕭即自爆與展鵬是小學同級同學，大讚展鵬當年乒乓球已好叻。