獲鄭秀文封「燈塔」 子華冀多拍戲提攜後輩

香港文匯報訊（記者 阿祖）賀歲片《夜王》前晚（3日）特別舉行「東日開運元宵春茗」，導演吳煒倫，主角黃子華、鄭秀文（Sammi），聯同王丹妮、楊偉倫（阿卵）、盧鎮業（小野）、何啟華（阿Dee）、楊偲泳、譚旻萱、李芯駖、林熙彤、蔡蕙琪（Kay）開live與戲迷一起歡度元宵佳節。據悉電影港澳累積票房昨日已突破7,777萬元，勇奪港產片票房榜第6位。

同場特邀蘇民峰師傅妙論各位嘉賓馬年運程，蘇師傅更大讚《夜王》片名改得出色，勢必衝破億元大關。子華與Sammi興奮元宵節與《夜王》團隊重聚。子華說：「好耐冇見過班員工，今晚真係有東日春茗嘅氣氛。」聽聞電影票房再創新高，Sammi以「感恩」形容心情，表示：「好珍惜今次演出，最開心的是觀眾感受到電影帶出嘅信息，睇完後大家有共同話題、好多思考，亦都好值得翻睇。同埋大家一齊享受呢個美好嘅成果 ，真係好開心。」子華亦認同：「《夜王》引起各種嘅討論、關心，可以話係為呢個城市點着咗啲嘢，多咗啲活力朝氣，我覺得係一件幾開心嘅事。」

Sammi更封子華為「燈塔」：「佢唔單止自己發光，仲令側邊啲人都一齊發光。今次有咁多出色嘅香港新演員，咁快就得到認同，梗係好到不得了。」子華自覺不無道理，指從《飯戲攻心》《毒舌大狀》到《夜王》，不少新演員獲觀眾認識，「希望容許我哋開多啲戲，大家多啲入場，令新人有更多機會俾大家睇到。」

網民敲碗若票房破億，希望子華唱宣傳曲《星秀傳說》「Shine一次 Version」。導演吳煒倫透露《夜王》原聲大碟正在籌備中，子華笑言「冇預我，唔好畀我搞散。」對於子華與Sammi會否再合作，吳煒倫爆料想拍喪屍片，子華笑說樂意被咬，但呼籲大家先支持《夜王》：「我哋仲有未完成嘅任務。」吳導指與團隊合作愉快，至於會否拍喪屍片，仍要再認真構思，「希望之後再有新諗法，大家一呼百應，吹雞又嚟玩多次。」

戲中「土地」（楊偉倫飾）與「太子峰」（盧鎮業飾）人氣高企，楊偉倫坦言受寵若驚，直言對「土地跳」獲觀眾喜愛感開心，最開心拍攝時導演好Open，能與子華一同創作。盧鎮業笑言從沒想過「太子峰」人氣會如此強勁，更即場重現戲中越南話台詞，「你哋係咪一齊嚟呃我錢」，技驚四座，引全場爆笑。

此外，獲封「MVP」的「葵芳」蔡蕙琪（Kay）被蘇民峰師傅預言未來兩年事業將有更大突破，她表示會保持平常心，會聽從師傅勸告今年唔揸車，搭地鐵，「多啲去葵芳站，我諗我運程應該會好啲。」她笑言日前在葵芳站宣傳時已被途人認出並要求合照，感謝大家支持。