陳健安新歌MV藏父親聲音

香港文匯報訊（記者 阿祖）唱作歌手陳健安紀念逝世20年的爸爸創作歌曲《梨子》，早前在個人演唱會上首唱，真摯演繹，感動全場。MV日前上架，以動畫配手寫歌詞字幕，片尾一段陳爸爸溫柔地氹小朋友的聲音：「汽水、雪糕，好嘢，拎晒出嚟」更是觸動人心。

安仔說：「好記得爸爸鍾意批梨皮一條過唔斷，攞畀我哋睇，呢啲生活情趣。其實我有啲價值觀、行為、生活習慣都來自爸爸，希望可以用『梨子』做引子，分享我傳承自爸爸嘅嘢。」MV以動畫代替真人拍攝，他說：「我唔想太煽情，不如用Animation（動畫）表達。」

至於MV加入爸爸的聲音，安仔表示問過屋企群組，知道姐姐曾用數碼相機拍片，當中紀錄了爸爸的聲音：「我諗爸爸估唔到自己把聲全世界都聽到，佢好鍾意威，𠵱家好威！嗰段聲係2002年，當時家姐拍緊自己個女，爸爸氹緊佢外孫女。」

安仔又表示「我爸爸性格幾唔聽人講嘢、幾任性，我都係。（爸爸係咪浪漫派？）從媽媽口中『你阿爸以前好靚仔』，講嗰時個樣係沾沾自喜。爸爸口甜舌滑，好識氹人，多才多藝，識打功夫、踢波、寫毛筆字好靚，每年都會寫揮春。」而因為找爸爸的聲音，家族多了一個有趣的親子活動，一家人重溫昔日短片好開心。