呂爵安李駿傑揭MIRROR玩新花樣 盧瀚霆馬年再拍劇重拾演員夢

MIRROR成軍8年，當中的盧瀚霆（Anson Lo）、呂爵安（Edan）和李駿傑（Jeremy）不單止是隊友，更是獲公司安排以分拆小組「妹豬組」拍團綜的好兄弟。相處了8年的他們，默契到底有多深？今個新年，三子接受香港文匯報專訪挑戰八載默契大考驗，結果笑料百出，同時亦默契十足。訪談中，他們亦披露MIRROR馬年的工作展望。●採、攝：香港文匯報記者 子棠

農曆新年，喜氣連連，Anson Lo、Edan及Jeremy齊齊向香港文匯報讀者拜年，祝願人人馬年行大運、新年快樂、身體健康！三人由MIRROR隊友至今相處了8年，彼此了解程度到底有幾深？踏入新的一年，他們接受默契考驗，各自寫出隊友最愛的賀年美食、必做習俗，以及過年禁忌，結果爆出有人「唔倒垃圾」、有人「偷偷洗頭」，十分搞笑。

默契考驗先由Anson Lo出擊，他稱Jeremy和Edan同樣最愛年糕；Jeremy必做的習俗是年廿八洗邋遢，而Edan必做的是逗利是。至於禁忌方面，Anson Lo竟指Edan「一定唔會倒垃圾」，因為「佢本身唔倒垃圾」；而Jeremy就完全沒有禁忌！兩位隊友聽完都不禁認同：「嘩，全對！」

輪到Edan反擊，他指Jeremy最愛食年糕，Anson Lo最愛蘿蔔糕，兩人都點頭認同。他又指Jeremy和Anson Lo都會逗利是，而Anson Lo在洗頭禁忌的時候真的會不洗頭。不過Anson Lo坦白自爆：「逗利是的確會做，但唔係我最鍾意嘅習俗，並且我會照洗頭喎！」

第三回合由Jeremy出馬，他指Edan和Anson Lo都喜歡食年糕，Edan一定會逗利是，Anson Lo一定會拜年。Anson Lo笑謂：「我都會拜年，但都唔係最鍾意嘅習俗。」最後，三人笑言猜測對方的都是「大路得嚟又中晒」，興奮得拍掌高呼：「果然不愧為一起出道8年的好兄弟！」繼而三子互送祝福，盡顯兄弟情。

談到新一年工作大計，Edan表示今年有許多計劃都與MIRROR團體有關：「包括MIRROR的演唱會、團綜，新團歌亦已經準備好，即將錄音和拍MV，新歌曲風幾新穎，係我哋未試過嘅風格，自己都好期待！」Jeremy則指MIRROR成員勇於新嘗試：「其實我哋成員之間都希望有一些新嘗試、與不同的人玩新嘢。例如我自己就想同AK（江𤒹生）合作，Anson Lo亦講過想同Tiger（邱傲然）和Lokman（楊樂文）合作，其實我哋可以有好多唔同嘅Combination（組合）！」Anson Lo亦透露個人計劃：「我年中會拍劇，事隔3年冇拍劇，可能會有啲生疏，好想藉此重拾演員夢。」

童心如初心 謙遜不自滿

提到Anson Lo和Edan將於4月4日兒童節在澳門合體舉行《MUSIC UNBOUNDED LIVE MACAU》演唱會，選擇這個日子開Show，是否童心滿滿？Edan笑言：「我同Anson Lo都有童心嘅時候，本身我哋都貪玩，有時Anson Lo仲會發出啲小朋友聲音，而保持童心真係好重要！」Anson Lo隨即鬼馬地扮小朋友聲音說：「童心就好似初心，要搵返個初心先可以繼續行落去，做人唔會驕傲，讓自己保持謙遜不自滿。」Edan立即轉小朋友聲音附和：「無錯！」連Jeremy也忍不住加入戰團，扮小朋友聲讚兩位隊友：「你哋好有童心呀！」場面爆笑。

Edan 髮型：Man Chan@CHIC Private i salon、化妝：San @powderclub_hk、服裝：Lane Crewford

Anson Lo 髮型：Denny Ku@CHIC Private i salon

Jeremy 髮型：Lydia Yung@CHIC Private i salon

Anson Lo & Jeremy 化妝：Rainbow Chung@Annie G.Chan Make up Centre、服裝：i.t & Lane Crawford