與趙璧渝任學院客席講師 朱晨麗面對輿論壓力大到喊

香港文匯報訊（記者 阿祖）前港姐冠軍朱晨麗與藝人趙璧渝早前到香港專業教育學院（IVE）首次擔任客席講師，與數十位莘莘學子分享演藝生涯，也談及初入行時種種困難及挑戰。

參選港姐入行的朱晨麗，笑言參選是因為「冇錢」：「參選時候，語言係最大挑戰，當時有勇氣站上台，係因為要『食飯』，知道唔嘗試就一定失敗。當時唔太熟悉娛樂圈，連擺Pose都唔識，但好感恩，過程中有好多本地女仔幫助我，又幫我惡補廣東話，我同佢哋關係都keep到依家。其實選美時，屋企人話有泳裝環節，佢哋叫過我唔好參加，不過我都努力克服。」身旁的趙璧渝聞言，表示很佩服對方的勇氣：「自己冇選美嘅勇氣，性格承受唔到咁大壓力，但又鍾意演戲，咁啱見到訓練班招生，於是就去試。」

提到初入行所遇的困難，朱晨麗自言當時自己連鏡頭在哪裏都不知道，更曾擋住了吳卓羲的鏡頭，鬧出笑話。不過，講到最大挑戰，朱晨麗認為是面對外界的抨擊及輿論壓力，她說：「當時只識喊，不知喊咗幾耐。」後來朱晨麗了解到喊都沒用：「要內心變得強壯，調節心態，接受唔到咪唔好睇啲評論。」至於趙璧渝初入行的最大困難，莫過於是經濟問題，她表示：「訓練班畢業後人工好少，好難捱，得幾千蚊月薪，所以要搵其他兼職去支持生活。」

二人亦分享了現時所面對的挑戰，趙璧渝表示：「做藝人要持續畀新鮮感觀眾，屬於大挑戰。同埋依家流行人工智能（AI）短劇，全部演員都係AI，真係好擔心取代真人演出。」至於朱晨麗就指作為藝人，最大恐懼是沒有工作，曝光率不足，擔心逐漸被觀眾遺忘，她更表示會順應趨勢，轉型經營社交媒體，希望進軍網絡世界，跟隨時代同步改變，但仍會堅持演員身份。趙璧渝則入行至今13年，現時除了做演員，同時會兼職教瑜伽和頌缽治療師。