黃淑蔓新專輯紀錄成長 拒扮成熟重拾童真

香港文匯報訊（記者 梁靜儀）黃淑蔓（Feanna）相隔近7年，推出第二張個人專輯《growth》，並將於15日於西九文化區自由空間「大盒」舉行首個個人音樂會，門票火速售罄，反應熱烈。

新專輯《growth》紀錄Feanna由做學生到社會工作的成長，她坦言初出道時刻意裝成熟扮大人，現在反而享受真我的童心，她說：「碟內嘅歌橫跨咗由我讀緊中學、大學到出嚟社會工作。細細個好多嘢唔識，或者唔知道現實嘅殘酷，出到嚟做嘢多多少少遇到一啲經歷，碟內有好多類型嘅歌，分為三部曲：受傷heart broken、自我療癒、重新出發，比喻成長。」

其中以藥水膠布和毛公仔代表「療癒」，Feanna與毛公仔身上都貼了不同大小的膠布，她笑說：「今日有三隻熊公仔陪我影相，最大呢隻叫『野比』，因為佢係大熊（《多㕸A夢》主角全名『野比大雄』），哈哈！我唔開心嘅時候就會攬住公仔一齊瞓，屋企兩隻貓就係識郁嘅公仔，我用佢哋抹過無數嘅眼淚。我超級鍾意公仔，經常會去買公仔、夾公仔，因為我見到公仔就被療癒，感恩有公仔陪伴。而另一樣可以令我開心返嘅就係『食嘢』！」

雖然Feanna表示「食嘢」是她另一個自我療癒的方法，但為了健康、增強抵抗力，她見營養師，花了半年時間減重超過10kg。她說：「我以健康角度出發，所以時間上會慢少少，有時會強差人意，我覺得最緊要自己開心，其實我而家呢個體重好健康。為咗靚啲，靚啲我都會開心，我會再努力啲。」