香港文匯報訊（記者 子棠）關智斌（Kenny）相隔6年再度開唱，定於9月26日及27日在啟德體藝館舉行一連兩場個人演唱會《The Endless Adventure Live in Hong Kong》。演唱會以「小飛俠Peter Pan」為概念，Kenny解構說：「細個已經好鍾意睇呢套卡通片，不過今次我唔係扮Peter Pan，而係用冒險島嘅精神，講成長嘅矛盾同掙扎。」而海報造型原來暗藏玄機，綠色撕裂衫的一邊代表Peter Pan，另一邊就似邪惡船長Captain Hook：「好似正義同邪惡喺我身上開戰，打到衫都撕爛埋。」
對於海報服飾性感，Kenny鬼馬指要show肌賣飛：「為咗賣飛嘛！點都（露）少少，希望咁樣可以幫到百零二百張飛啦，咁就功德無量，哈哈。」不過Kenny直認近排真的操得好fit，除了為演唱會，亦因為早前要參加健身比賽，隨後又大爆拍攝海報期間的趣事：「因為件衫開胸，我整個團隊無論目光定相機，全部都對住我的波罅，好彩我有操開，都見得吓人，不用尷尬！」不單止網民、就連許多藝人都將焦點落在Kenny的「暴乳」海報上，紛紛寫下搞笑留言；而公司一班兄弟姊妹如容祖兒、蔡卓妍、鍾欣潼、謝霆鋒、李幸倪、泳兒等，都紛紛於自己的社交平台轉發演唱會消息，落力支持。
Kenny指今個演唱會不僅是一場演出，更是一段成長路上不斷冒險探索的旅程，要有面對無常世界的勇氣。在這一個你我都不會長大的晚上，將由「永遠的彼得潘」帶領大家，找屬於自己不一樣的答案。除此之外，Kenny預告：「個show會有好多跳舞部分，rundown精彩到我自己都睇咗十次，保證唔會悶親大家！」
評論