丘嘉滎

姚本輝馬房已經連贏三期，今次繼續有不少實力分子，除咗上場蝕晒形勢都追得好嘅「樂勝天下」求補中之外，形勢轉好嘅仲有「快樂老撾」。

呢匹馬上場睇落好似無乜走勢咁，不過早段因為排中外檔關係，而被頂出四疊，「快樂老撾」韁口唔好搶晒口，及後雖然埋到二疊，不過開頭耗力末段騎落均速，好在該仗時間水準不俗，跑第二名嘅「天外迎天」再出補中，而且「快樂老撾」曾經喺田草千四都上名，只不過韁口問題未能贏馬，今次除咗排檔轉好，同場又有足夠快馬，「快樂老撾」預計有好形勢，加上今次抖夠四星期，搵番上名拍檔嘅梁家俊，人馬曾經喺同程排外檔蝕晒都上名，而家評分比當時少4分，希望「快樂老撾」喺四班交代啦！