【地表最強】實力哥升班繼續捧

兆　文

第二場第五班1200米泥地。「南區旺」已第三季在港服役，記得前季初出一役已捧為熱門，上季因傷五個月內僅跑七仗，然而當中有六仗是10倍以下熱門，足見幕後自視甚高。一再拚失一再失望，羅富全不斷變陣，包括為「南區旺」改配備及轉路程，結果上年尾轉攻同程，拚獲亞軍只輸短頭位，終於搵到最佳出路。該仗之後，連續跑三戰同程，大前仗跑濕泥獲亞，前仗跑好地不只順利坐正，甚至輕勝兩個多馬位，今仗主要對手「火神神樂」完全無還擊之力。「南區旺」開竅後持續神勇，上仗跑番草地，仲要排大外檔一樣入位，今仗更跑番強項馬勇路合，勝望壓一。

第七場第三班1200米泥地。「實力哥」上季尾開竅，於泥地1200打開在港勝門，贏馬後再跑同程四次，悉數殺入前四名，演出轉向穩定。此駒因一對前腳輪流受傷，以致今季遲遲才復出，難得前仗抖近一年重返戰團，狀態顯然未十足，結果仍追回亞軍，黃智弘沿途攞位冇犯錯，只是頭馬「加州星馳」博位成功，慳了腳程才衝贏，上仗再遇「加州星馳」，後駒表現失準，「實力哥」則交出前仗一樣的走位，衝刺如刺輕鬆贏馬。偏向慢熱的「實力哥」，來到此際才踏上最佳時候，升上三班尤其今仗弱組不落下風，季內僅兩仗體力充沛，睇埋最近試大閘後上甚勁，可以放心追捧！