今期四班千二拆咗三組，總共吸引近70匹馬報名，所以有啲馬匹打王牌都未能成為正選，既然係咁不如留意吓，有優先出賽權嘅參戰馬先！始終練馬師要配合出擊就要提早部署，好似告東尼馬房咁。

第七場掛頭牌的「加州得力」明明14日前已經攞到優先出賽權，上個星期馬房反而為「驍勇者」同埋「萬事得意」報名，反而等到今期配合埋「加州動員」一齊出擊，「加州得力」今季贏馬時排4檔可以守三、四位，而且馬匹前幾場喺三班都係留後兜大彎蝕晒咁跑，感覺都係想減分落返四班，今期「加州得力」求仁得仁成功降班仲要抽靚檔，兼且配布文死磅較少，加上馬房仲有邊線馬配合而來，「加州得力」部署上顯心思搏佢一降班就得手！