【豐力深作】喜旺駒係時候交代

黃子豐

「喜旺駒」第一季上到三班贏兩場千四後，馬房為咗隻馬踏入第二季後，主攻幾埸四歲系列大賽，一直集中跑中距離。其實大家睇番，隻馬就算第一季贏兩場千四時，姿態根本冇初出贏兩場短途時咁好。隻馬第二季為咗跑大賽越跑越長。

輸咗三場大賽後，馬房開始慢慢縮程落中距離。但因為呢隻「喜旺駒」本身性格忠心，變咗就算跑中距離，一樣不停咁跑得近，而馬房見隻馬喺中距離不斷有競爭力，結果又繼續跑中距離。呢個情況，到咗上季踏入第三季，部署上亦冇乜點變。結果輸下一季，輸下又一季，隻馬前季同上季，結果一場都贏唔到。連輸兩季後，方仔今季終於死死地氣，肯縮番隻馬跑短途，但亦只係泥地千二，嚴格嚟講，呢匹馬雖然泥地曾上過名，但點講都好，佢草地證明嘅能力，始終係比泥地多嘅。上次終於肯跑草地短途嘅「喜旺駒」，其實在三班表現算係出色，今次落返嚟四班谷草千二換一批對手，我睇係時候交代了。