丘嘉滎

潘頓剛戰少有地老貓燒鬚，「跨境寶馬」早段埋到二疊走，直路上頓哥刻意攞開啲，不過馬匹內閃嚴重，連頓哥修正時都非常狼狽，雖然大家斟酌於末段騎師騎都唔到，贏馬實屬好彩，不過而家競賽小組甚為嚴格，萬一真係有踫撞有機會發生意外，而且一哥身家豐厚梗係要小心為上，最後小組警告練馬師改善馬匹走規先再出賽，記得之前「深心星」要多次喺試閘力策至終點，見到明顯改善先畀佢落場，始終為咗保障投注人同其他馬匹安全，做足啲預防措施等大家都安心。

今期一哥坐騎少，尾場「安康萬里」近兩場轉跑谷草都有走勢，尤其是上場希威森排中外檔選擇上前，最後蝕快速不敵「翠紅」但完成時間突出，今期同場有足夠快馬，有權補中！