丘嘉滎

今期賽前一日天氣起變化，究竟跑道係快係慢都未知，不過嚟到季中尾階段，有能力嘅三歲馬開始入局，甚至成為熱門，但萬一遇上變化場地，分分鐘交唔出應有表現，咁不如吼吓啲半冷門。

第六場四班千四拆組賽事，好多馬匹條件麻麻，一係有健康疑慮，一係實力馬排外檔，再唔係年輕馬容易出錯，「心雄雄」雖然未曾上名，但馬匹季中喺三班一千都跑入獎金名，降班後跑千二照計更合腳法，可惜338場次塞車只得第四，翌仗「心雄雄」排大外檔留到最後，楊明綸好好心機咁喺近欄搵位，可惜末段追唔切，可能因為馬匹細細粒得一千磅左右，所以上場選擇上三班負輕磅，不過對手偏強，而且「心雄雄」跑落偏均速，外地又贏過千四，今期落返四班排中檔有權守好位，可能俾到驚喜大家！