兆　文

第七場第二班1600米。「陽光勇士」上年1月21日首度入Q，從此踏上青雲路，之後兩戰全勝，去到6月16日取得第三W。當銳惡馬今季74四分起步仍佔優勢，首戰捧到24蚊順利得手，跟手上到二班場場殺入前列，大前仗出爭1400發揮極差，嚴重受困根本無跑過，幸好接戰重返同程1600換人補中，仲要捧到14蚊充滿信心。

上仗加九磅再戰退居第四，頭兩馬同樣輕佢九磅，輸在負磅雖敗不辱。「陽光勇士」最近在從化試閘表現對辦，勇態未見低落，仲要今戰分區上限105分，因此毋須負重，甚至比上仗輕了四磅，更排埋一檔形勢大好，再贏話咁易。

第九場第三班1400米。「至尊高超」三歲馬，出賽六次得兩冠三亞一季，首三仗跑限制賽對同齡馬都係僅敗，反而大前仗初遇年長馬，卻能打開勝門，且擊退的「幸運芙蓉」及「衝上雲霄」都係四班班頂角色。「至尊高超」前仗未能再下一城，排十檔形勢一般，仲要初跑三班，只敗於超級馬「光年魅力」獲亞雖敗猶榮。上仗五檔起步，形勢有利得多，早段毋須用力切入，結果輕鬆跟前並順利贏馬，更跑出1.20.93，比前再進一步。只三歲已光芒四射，具備躋身高班條件，原本三班1400已水準不高，今日更拆分兩組，對手弱上加弱，檔好、路程、配搭又煞食，有利條件盡集一身。