兆　文

第九場第三班1400米。「有目共賞」8月中開操，9月19日試首課大閘，之後一度受傷，10月5至10月20日缺課，就算之後做番兩課大閘亦唔足夠。

事實上，「有目共賞」第一次出賽畀我感覺好生，試閘麻麻、試跑生硬，毛色好淡，點知該仗交出全場最快末段。上仗改配巴度，16倍馬冇咁冷，結果更殺入一席位。睇番片，「有目共賞」起步慢咗，巴度立即推騎，同時搞到隻馬上口難操控，更弊入直路大半程被「包裝福星」封了去路，之後又跟住「鈦易揾」，直至150米先至轉出外疊望空，如此情況下都追到第三，確認係高質馬。今次改配麥道朗，發揮當然好得多，排四檔守二疊生位仲好，篤定補中。

第十場第二班2000米。「桃花開」、「米奇」都在上仗出錯，年輕馬一錯再錯例子屢見不鮮，更重要分數已足夠入選香港經典盃、甚至打吡，今戰留以有待絕不出奇。此外一提，相隔一周出賽馬通常抖兩至三日復課，然而「米奇」卻抖至周五才在內圈復操，備戰方面也存在顧慮。既然兩匹四歲馬熱而不穩，一於追捧當打當紮的「愛心神駒」，過檔廖廄脫胎換骨，上仗贏同程跑出2.00.96，原來對上三季只有「浪漫勇士」快過佢，再看周五出跳由廖康銘親試，大踏步而馳，不只毫無疲態，且表現威風凜凜，反映不斷進步。