鄭希怡結合3語挑戰唱Rap

香港文匯報訊（記者 阿祖）鄭希怡（Yumiko）接受新城節目《QK玉瑛室》錄音訪問大談近況，並宣傳下周推出的新歌《Lady King》，原名「鄭列瓊」的Yumiko表示：「首歌是講我自己『瓊姐』，因為我細個在慈雲山讀書，所以有個名叫『慈雲山瓊姐』；今次亦都首次挑戰唱Rap，用了廣東話、普通話同上海話擺喺入面，3種語言都代表我成長的一部分。」

Yumiko在疫情期間與老公梁學儲（Andy）及女兒「梁浸浸」舉家移居上海，至最近正式回流返港，她表示：「我們在上海住了3年，因為疫情期間剛巧在內地拍綜藝節目《乘風破浪的姐姐》，之後有其他工作同拍戲，返香港又要隔離，我父母一直住在上海，他們就話不如留在上海，我同老公傾了之後，他就帶阿女過來，一家人一定要一齊。」

女兒梁浸浸今年9歲，近日已正式開學，問女兒返港讀書是否要重新適應？Yumiko表示：「她在上海讀書可以揀繁體定簡體字，我幫她揀繁體字，所以返香港讀書不用咁辛苦。」Yumiko又稱十分享受做媽媽及照顧女兒，同時希望陪伴女兒經歷不同階段，問梁浸浸是否像其他少女般貪靚？Yumiko表示：「她好唔鍾意扮靚，買裙給她都唔着，寧願着T恤短褲，她對靚未有概念，不過她好獨立，好有自己諗法，幾似我同老公。」

Yumiko又提到當初並沒想過結婚，卻在2012年接受Andy求婚：「那年我們去泰國給朋友生日驚喜，那個朋友係應采兒，我同她企在泳池邊影相，兩個一齊向後跌咗落後面的樹林，我康復期間還戴着頸箍，行路又唔方便，在我最醜樣時，他（Andy）就同我求婚，當刻我覺得這個男人唔錯，其實我有咩事或傷殘他可以走，但他選擇婚姻，既然他願意試，我都願意試。」