被譚玉瑛搞錯男友惹尷尬 衛詩雅讚未婚夫樣樣掂

香港文匯報訊（記者 梁靜儀）衛詩雅（Michelle）被爆出早年帶靚仔男友出席張敬軒聖誕派對，早前接受醫生男友求婚的她，即說：「𠵱家我未婚夫仲靚仔，崇拜未婚夫學術、藝術、心靈上樣樣掂。」

Michelle日前現身新城廣播接受譚玉瑛（阿譚）、何基佑及麥皓兒主持的《QK玉瑛室》訪問，阿譚透露早年應張敬軒邀請到他家中出席聖誕派對而結識Michelle：「當日好多人，人多到都唔知見到邊個，但Michelle嘅裝扮好靚，頂帽又大又靚，吸引咗我望住佢，跟住就走埋去認識佢。」Michelle指當時既驚且喜，沒想過由細睇到大的譚玉瑛姐姐會主動跟她聊天。阿譚隨即爆料：「當時Michelle的男朋友都喺隔籬，又係好靚仔。」不過剛接受醫生男友周祉安求婚的Michelle就一臉尷尬澄清：「唔係嗰個，𠵱家我未婚夫仲靚仔，好驚，哈哈！」

問到Michelle結識異性是否以靚仔為首選？她就否認道：「又唔係，要傾到偈，價值觀要相近，同埋一定要有嘢我好崇拜佢。（未婚夫有咩令妳好崇拜？）任何嘢，我覺得佢好叻，每次問佢問題，無論學術、藝術或者心靈上佢都解答到我，我係好感性嘅人，佢好理性，可以拉得住我。」

另外，近年不停自我增值的Michelle，多年來考獲導遊、救生員、鑽石鑑證及船牌等，由於未婚夫做醫美行業，為了跟上未婚夫的步伐，她透露10月又會考美容及化妝品等美學應用。