陳展鵬留鬚超型 太太想要個仔 林夏薇爆老公睇得投入 要放狗咬方力申

香港文匯報訊（記者 梁靜儀）陳展鵬、林夏薇（薇薇）、劉佩玥（Moon）、馮盈盈、方力申、張頴康及蔣祖曼等，昨日出席無綫劇集《逆天奇案2》宣傳活動，展鵬更下跪送上紙戒指向薇薇求婚，重演求婚一幕。

展鵬在活動上自爆劇中留鬚造型，連太太單文柔都讚有型，笑言搞到差點要生多個。問到為何不繼續留鬍鬚助攻生育計劃？他解釋因個女唔鍾意：「我每朝起身太太都見到我個鬚根樣，都努力想生多個，順其自然，不過女兒小豬比唔鍾意我留鬚，我就遷就佢，方便親親。」

薇薇老公自認係現實中嘅森Sir

展鵬又指因女兒淚點低，不敢讓她看該劇，否則她會真喊。說到他向薇薇求婚，女兒又會否誤會他鍾意其他女人？展鵬笑說：「個女有去過片場探班，佢知爸爸有好多個老婆。」說到他要多演喜劇，好讓女兒可收看？展鵬自言經常在屋企演喜劇。

薇薇亦大爆老公睇劇睇到喊，令家裏出現奇觀，她笑說：「老公向來好理性，估唔到佢睇到25集，我喺監獄向展鵬求婚睇到喊，話要放狗咬方力申，又話自己係現實中嘅森Sir，我話呢場都喊成咁樣，大結局點算？」問到結局是否很催淚時，薇薇就不肯透露。說到她的演出獲網民大讚，可會增加再奪視后的信心？她說：「我冇諗太多。」

馮盈盈纖腰美腿勁搶焦

馮盈盈一身滑浪Look大騷纖腰及白滑美腿勁搶焦，她表示都是配合劇情，又稱內裏有穿比基尼。問到是否已很久沒有在公開活動中穿三點式？她說：「工作上真係少，（好搶鏡？）多謝。」身旁的Moon被問到若收視再升的話，會否穿泳裝答謝觀眾？她說：「如果減肥成功，夏天都可以着（三點式）嚟影相，𠵱家已經減咗好多。」

盈盈被問到舊愛鍾文浩，日前以專科醫生身份亮相TVB節目《早D知早D醫》，被網民大讚靚仔有型，她卻稱不知情：「𠵱家我哋工作範疇都唔一樣，平時好少交集。（心急想再拍拖？）唔會啦，我都話咗兩年內唔諗呢樣嘢。」阿Moon就笑言會Mon住盈盈。

劉佩玥想自薦演《新聞女王2》

劇中飾演巴辣八婆仔角色的Moon表示沒想過觀眾會喜歡她的角色，演的時候幾過癮，而出街時亦未有被人鬧，不過今次的演出暫時可能成為絕響：「因為演八婆仔其實好攰，要用好多energy。」

另外，預計明年初開拍的《新聞女王2》，今次會加入兩女一男新角色，劇集總監製鍾澍佳網上公開招募演員，Moon聞言表示有興趣：「我想自薦演好衰嗰個角色。」她表示之後會拍鍾澍佳的新劇，要返內地拍攝。至於盈盈就說：「我咩都OK，阿Moon去，我搭單一齊去。」