香港文匯報訊 （記者 子棠）炎明熹（Gigi）一連三場《炎明熹Gi-FORCE演唱會2024》昨晚圓滿落幕，最後一場演出，Gigi感動得三度落淚；雖然發生了小蝦碌，不過更顯出Gigi執生能力提升不少，還得到任賢齊（小齊）驚喜現身大讚Gigi是未來的天后！
Gigi的尾場個唱同樣獲不少圈中人捧場，包括陳煒與丈夫陳國強、姜皓文、陳山聰與囝囝陳霆軒、李幸倪等。Gigi依然狀態大勇落力的大唱大跳，不過打後空翻時就發生了小插曲，正當Gigi完成動作落地時，可能用力太猛被身上衛衣的帽「兜頭笠」，遮擋了視線，Gigi先露出可愛尷尬的笑容，再秒速整理衣服繼續跳唱，緩解了這個蝦碌場面。當晚亦是去年十月因颱風而取消的補場場次，Gigi問觀眾當時有沒有失望，而得到全場大叫「冇」，立即笑讚歌迷思想正面。
當Gigi演唱《星語心願》唱到「讓你知道我愛你」的歌詞時，台下即熱情回應「我都好愛你呀」。她表示小時候看電影《星願》已經很喜歡電影的男主角，隨後唱出《對面的女孩看過來》，小齊突然現身合唱，歌迷驚喜得全場大合唱為演唱會掀起高潮。唱畢，小齊謙虛感謝Gigi畀機會自己做嘉賓：「 因為我成間公司所有同事都好鍾意Gigi。噚日我喺新加坡做完演唱會返嚟，我啲夥計全部唔見曬，個個都嚟睇你，仲要一張飛都冇留畀我！同事們，聽住，聽日返工唔使咁早，好好享受今晚Gigi嘅演唱會。」他又笑謂Gigi與自己的女兒同一年出世，搞笑說：「人多嘅時候叫我小齊哥，唔好叫Uncle呀。」而Gigi就送上繡有小齊名字的水樽作回禮：「我知你5月份開巡迴演唱會，所以揀咗呢個識自己煲水嘅水樽，非常方便，我都繡咗你個名喺度。」小齊自嘲年輕的時候仍會飲凍飲：「漸漸就用咗暖水壺啦，好多謝你。我真係成間公司都講，佢係未來嘅天后，希望大家都畀多啲機會Gigi。」最後小齊再為樂迷送上《我是一隻魚》，全場跟着和唱。
為演唱會擔任音樂團隊成員的林智樂（Felix）來到尾場都按捺不住，在台上公開力讚Gigi除了唱功了得，抗壓能力亦很強悍：「雖然有好多人讚佢，但有時都有啲好尖銳嘅留言，但佢都冇嘢，更重要係由我啱啱識佢到而家，佢個初心都冇變，對每個人都好好。有時記者朋友問我會唔會羨慕Gigi嘅事業，我覺得唔係羨唔羨慕，而係佢真係好值得擁有！」令身旁的Gigi十分感動。
當晚Gigi應歌迷訴求唱出新歌《還有一艘救生艙》，以慶祝MV在短短4天破百萬點擊，但卻一時感觸唱到喊，幾乎大半首歌要台下歌迷代唱，Gigi說：「我覺得我又代入咗首歌裏面，但唔係愛情，今日係最後一場演唱會，然後大家要遠離我嘅感覺。今晚唱呢首歌係想送畀補場嘅大家，但係我真係冇用，成首都唱唔到，要大家幫我，我下次會唱好佢㗎。」台下再次大叫「加油」，為哭成淚人的Gigi打氣。安歌時Gigi再特別加唱《你是你本身的傳奇》，Gigi落淚的表示台下每位歌迷都是一個傳奇，一起成就了她的歌手夢；到唱到最後一首歌《Only For Me》，Gigi望向歌迷用手機燈營造的一遍燈海，淚水再一次滑落，而演唱會在淚水與不捨之情下，感動落幕。
評論