梁振輝 香港資深出版人

「傾數/講數」多指兩夥人傾談/商談一些具爭議性的議題。「傾掂數/講掂數」就是對某個議題通過商談而達成協議。

「斟酌」指考慮可否而決定取捨，廣東人會用單一個「斟」字來表示「傾數/講數」。

示例1：

A：人多好食作，人多好做作，人多幾好吖！

B：好似而家咁，人多好難「傾掂數」喎！

C：坐低慢慢「斟」，實掂嘅！

「搞」指做、辦，所以「搞掂」有搞好、搞通的意思。說普通話的人說不準某些粵音殊屬正常，「掂」就是其中一例。由於「定/ding6」與「掂/dim6」音近，久而久之人們就把「搞掂」讀成「搞定」。又由於「定」有穩當的意思，大部分內地人包括香港人都以為「搞定」正是「搞掂」的書面語，真個是個美麗誤會哩！

示例2：

大耳窿（高利貸）：傻強嗰條數追極都冇得還，你同我「搞掂」佢！

手下：你嘅意思係幫你跟呢條數，定「對冧」佢呀！

就以上示例的語境，黑道中人會用「搞掂」來作為「整治/解決某人」的暗語。

「恰恰」指剛好。「恰恰掂」就是指結果恰到好處、完全不會出現任何亂子。通過音變，「恰/hap1」讀成「tap1」，廣東人就把「恰恰掂」讀成「tub tub 掂」了。

示例3：

A：你老公有型又靚仔，喺出面都應該有大把女投懷送抱喎！乜得你咁叻，搞到佢「tub tub 掂」（循規蹈矩）嘅？

B：冇嘅，我係屋企唯一嘅財政大臣，冇錢佢飛得去邊呀！

以下是一個頗傳神的廣東話歇後語：

肥婆坐塔——恰恰陷（tub tub 冚）

「塔」指屎塔（坐廁），肥婆肥大的臀部剛好「填滿」了整個坐廁，所以就有這個諧趣的講法。

示例4：

個兜唔見咗個蓋，估唔到可以搵返一個好似「肥婆坐塔」，「tub tub 冚」嘅蓋！

上世紀七八十年代，黑社會活動猖獗，「同門」因分贓不勻、「拆」賬不均而互相廝殺，時有所聞。就以下一個歇後語：

四四六六——拆掂佢

我們可看出它來自「江湖」的可信性相當高。通常他們在將有搞作、大買賣之前或之後都會協商分賬方式。在未能平均分拆的情況下，一方大約會這樣說：「你四我六，你六我四，都無所謂喇；大家兄弟，總之就『四四六六，拆掂佢』！」若然將「四六分賬」改為「三七」、「二八」、甚或「一九」，這代表了毫無談判誠意，即「拆唔掂」。實話實說，「四四六六」只是有人吃了點虧罷了。

「四四六六，拆掂佢」雖則來自「江湖」，卻蘊含了一個實用的協商技巧，絕不等同一般粗鄙話語。在黑社會的生態中，當幫會之間出現矛盾——私人恩怨或利益衝突，所涉雙方多會相約坐下商談，期望可在不動干戈的情況下把事件擺平，也可說成「四四六六，拆掂佢」。

久而久之，當人們想到需要用一個計策去解決某個問題或協調分歧意見時，也會說「四四六六，拆掂佢」，這裏當然不涉及拆賬。

示例5：

A：呢個世界，如果大家都係抱住「四四六六，拆掂佢」嘅心態，就冇咁多「爭拗」（爭議）喇！

B：講就係咁講，不過做起上嚟就好難嘞！