【粵語講呢啲】當黑·頭頭碰着黑·黑仔·黑過墨斗·非洲黑夜打烏鴉·老襯當旺·折墮

梁振輝 香港資深出版人

一片光明多數用嚟形容一路走嚟暢順、幾好環境嘅意思。光明嘅相反係黑暗，廣東人會形容唔暢順、環境惡劣做「黑」。話人成日都咁「黑」，會講做「頭頭碰着黑」或者「當黑」。香港人會叫嗰啲「當黑」嘅友仔做「黑仔」。一般相信「黑」嘅人都係因為運氣差，即係運滯。咁睇，筆者認為「黑仔」都有可能係由「黑滯」音變過來：

滯 /zai6；變調→仔/zai2

「墨斗」形狀似個斗，用嚟響泥、石、瓦等上面畫直線，係「三行」（建築行業）中一種唔少得嘅工具。「墨斗」嘅結構好簡單，只係一嚿四方木，上面挖空，愛嚟裝墨水。斗中間有個線轆，可以拉一條線出嚟。用「墨斗」蘸線，再將墨線拉直，然後響物件或地上振彈一下，咁就留低咗條長長嘅黑直線記號。「墨斗」係魯班發明嘅，古時建築工地開工上樑嗰陣會擺上「墨斗」祭拜，一方面係對呢位祖師爺魯班嘅尊敬，另一方面據講有辟邪作用。如果話人好「黑仔」，舊時啲人會話佢「黑過墨斗」，用「墨斗」嗰陣個墨倉裝滿黑色嘅墨水，比墨水更黑就真係好「黑」囉！

如果話人連環遭遇不幸或者霉氣纏身，用以下呢兩句嚟形容就最適合不過：

屋漏遭逢連夜雨，行船又遇頂頭風

廣東人就會講「黑上加黑」。非洲住嘅係黑人，睇唔到月光嘅夜晚就係黑掹掹，如果班非洲佬喺呢個夜晚出動去捕獵烏鴉，咁就即係「黑上加黑」，有冇收穫就好難講嘞！廣東人就呢個情況創作咗以下一個歇後語：

非洲黑夜打烏鴉——黑上加黑

「當黑」嘅相對係「當旺」，中國人一般認為條命如果生得好，好多時都會「行運行到腳趾尾」，「當旺」就好似係定律咁。廣東人會叫嗰啲笨笨鈍鈍或者容易畀人呃嘅人做「老襯」。正所謂，世事無絕對，雖然機會唔多，但係話唔埋；如果真係畀個「老襯」遇到一啲咁難得嘅「當旺」情況，廣東人就會用「老襯當旺」嚟諷刺一下佢！

廣東人開口埋口就講「折墮」，「折墮」就係話啲人好坎坷，如果繼續咁落去真係死咗好過。首先「折墮」唔係書面語，「折」、「墮」可以分別理解做「挫折」、「折磨/折騰」同埋「墮落」，所以「折墮」就係一個遭逢「挫折」、受盡人間「折磨/折騰」嘅「墮落」狀態。「折墮」可以愛嚟做咒語。

示例1：

嗰條友成世做埋咁多陰騭嘢，你睇佢幾時「折墮」；就算佢自己冇事，都會過畀佢屋企人嘅！

示例2：

老梁，我哋中國人注重孝道，我啲仔女而家又咁錫我，肯定老咗冇「折墮」呢支歌仔唱！

老陳，你再老啲佢哋識得去照顧你咁就梗係very good喇，如果冇你就「折墮」喇！

「折墮」有時可以愛嚟做反話。

示例3：

「折墮」喇，個個仔女都畀錢我使，點使得晒呀？

老梁，你成日響度晒命，你遲早「折墮」！