【粵語講呢啲】青BB點寫呀？口輕輕、下巴輕輕，口花、口花花，點解咁講？

梁振輝 香港資深出版人

「青BB」，當然唔係話全身青色嘅BB，而係一個粵語疊詞，用嚟形容非常青綠嘅嘢；如果用嚟形容面色，就係指面色蒼白。「青BB」點寫呀？

青必必 青咇咇 青啤啤 青嗶嗶

呢幾個係最通行嘅寫法，不過全部都係用咗「借字」，咁「正寫」係邊個呀？

一講到「正寫」，啲人就會去搵啲古書，睇下有咩疊詞係用嚟形容青色嘅；有唔知邊位粵語專家就喺元代關漢卿《雙赴夢》裏頭，搵到個「青鴉鴉」，就認定「鴉鴉」係BB嘅「本字」，呢個講法跟住就喺網上流傳。冇錯「青BB」係有「青鴉鴉」嘅意思，但係「鴉」個讀音同B嘅讀音，好似「大纜都扯唔埋」喎！筆者一直強調，「本字」一定要夾「音」同「義」，是但一樣接近，都唔可以構成作為「本字」嘅理據。根據筆者嘅考究，「青BB」係由「青碧碧」音變過嚟：「青」係「淺綠」，適當嘅形容詞係「碧綠」；廣東人就聯想到「碧碧」呢個疊詞，於是就創作咗「青碧碧」；講下講下，咪講咗做「青BB」囉！雖然「正寫」已經搵到，筆者建議寫嗰陣都係寫做最簡單嘅「青BB」，香港人中英夾雜係冇問題嘅！

「口輕輕」呢個成日用嘅粵語疊詞，當然同「口」嘅重量無關。如果話人講嘢草率、唔謹慎、講過唔算數，書面語就會用「輕言」。「言」由「口」出，廣東人就創作咗「口輕輕」呢個同義疊詞。又「口」同「下巴」相連，「口」喐「下巴」點會唔喐，有人就嚟個「口」同「下巴」代換，咁「口輕輕」就變咗做「下巴輕輕」喇！「輕」，文讀「兄/hing1」，喺「口輕輕」、「下巴輕輕」呢兩個語境度，「輕」會取用口語讀音「heng1」。廣東人指嘅「貪口爽」或者「口爽爽」，即係順口噏，冇經大腦去講嘢；意思同「口輕輕」、「下巴輕輕」差唔幾。值得一提，「下巴」嘅口語讀「下爬/扒」，所以有人會攞「下爬/扒」嚟做「俗寫」；可以咁講，有「正寫」就冇必要寫「俗寫」嘅。

「口花」唔係個口咬住朵花或者一枝花；「口花花」都唔係個口咬住幾朵花或者一紮花。話人講嘢冇句真，不過虛假得嚟動聽，書面語會用「花言巧語」。廣東人會話「滿口花言巧語」，尤其嗰啲鍾意撩女仔嘅人做「口花」；「口花花」嘅意思都係一樣，可以睇做「口花」嘅加強版。話時話，好多人，尤其係女士，明知同佢講嘢嗰條友「口花花」，但係都唔會鬧佢或者嬲佢。冇嘅，讚自己瘦、讚自己靚、讚自己叻、讚自己後生，天下間邊有人唔受㗎？