◆ 梁振輝 香港資深出版人

就圖中各人捉到鹿之後所選取嘅處置方式，廣東人會話佢哋「捉到鹿唔識脫角」。呢句廣東俗語就係話捉咗隻鹿返嚟，都唔曉得將佢隻角剝落嚟。點解咁講？

「鹿茸」多數係指梅花鹿嘅雄鹿，未骨化而帶茸毛嘅幼角，屬於一種珍貴中藥材。咁講，唔係是但一隻「鹿角」都做得「鹿茸」㗎！明代醫學家李時珍響《本草綱目》，對「鹿茸」嘅作用有咁嘅撰述：

生精補髓，養血益陽……

講白啲就係「壯陽」。唔怪得知歷代富商巨賈、王孫貴冑都當佢係寶；平民何嘗唔係，不過冇錢買啫。

由於「鹿角」係珍貴藥材「鹿茸」嘅所在，所以係鹿身體中最值錢嘅部位，所謂「捉到鹿唔識脫角」有以下嘅寓意：

遇到但冇好好利用

遇到但冇將佢嘅專長好好發揮

遇到但冇將佢最美好嘅發掘到

遇到但將資源錯配

總而言之，就係遇到但冇好好把握機會。可以咁講，「捉到鹿唔識脫角」就係「嘥料」囉！

2014年，馬英九喺一個場合度，將「鹿茸」講成「鹿耳朵裏的毛」，咁低級嘅口誤隨即引起公眾譁然。有政府官員喺回應事件嗰陣，仲一口咬定以馬英九嘅身份係唔會錯，一定係大家聽錯，分明係指鹿為馬。有人就畫咗幅鹿耳朵裏頭生角嘅漫畫，嚟到諷刺馬英九呢次口誤但係唔承認嘅行為。直到2016年馬英九卸任之前，佢響Facebook度回覆網民過往留言嗰陣，先至拍咗條片嚟交代當年嗰單口誤事件，除咗認錯之外，仲罰自己抄：

鹿茸是指中藥單方中，還沒有骨化長滿絨毛的幼角。

呢單事件先至告一段落。其實呢單口誤事件只係小事一樁，不過大家可以從中評估一下馬英九嘅政治智慧：雖則公開承認自己愚昧無知，會挑起公眾質疑你嘅管治能力；但係默不回應以及默許其他人代作否認，就真係好敗筆。反而如果喺第一時間公開認錯，公眾會感受到你作為地位相當嘅人應有嘅氣度，冇減分之餘仲有可能有加分。可惜馬英九冇抓緊呢個機會，都可以話「捉到鹿唔識脫角」嘞！

現代市場瞬息萬變，喺商場上要突圍，背景好重要。要建立一個「品牌」，唔係你投入幾多資源，就一定可以辦得到。如果你仲係擁有一個百年「歷史品牌」，又如果你想發大嚟做；毫無疑問，成功嘅機會係相當高嘅。如果香港「蓮香」有利用到本身嘅獨有優勢，相信就算大家投放相同嘅資源，同行嘅競爭對手拍馬都追唔上。可惜，世上冇如果，「蓮香樓」仲搞到要執笠㖭！

上世紀初，廣州「蓮香樓」嘅出品，除咗受坊間追捧之外，「蓮香月餅」仲成為咗港澳同華僑推崇嘅月餅名牌，可謂認真巴閉！九七回歸之後，香港與內地交往日趨頻繁，「自由行」直接帶旺香港嘅消費市場。中秋係中國人嘅大節，作為送禮佳品嘅月餅點少得。「蓮香」個朵以前喺內地咁響，加上「香港製造」係幾咁有品質保證，「蓮蓉月餅」肯定可以佔一席位。香港「蓮香樓」就係有呢張超級皇牌，如果認真去做好月餅呢瓣，「蓮香樓」點止企得住，仲可以賺到盤滿缽滿；就算遇上超級經濟低潮，好似今次新冠疫情，都絕對有足夠彈藥去應付帶來嘅巨大衝擊，講落邊度有得輸㗎！以下兩句可能係「蓮香樓結業」最恰當嘅結案陳詞：

捉到鹿唔識脫角，識賣月餅冇頻撲