【粵語講呢啲】老餅Old Cake；蓮香樓結業：成也老餅，敗也老餅

梁振輝 香港資深出版人

「老餅」又叫唐餅，原來指傳統粵式糕酥點，例如：月餅；雞蛋糕、合桃酥、皮蛋酥、紅綾酥、黃綾酥、白綾酥、橙綾酥等等嫁女餅。咁睇，「老餅」應該有返咁上下歷史，所以啲人會叫老人家做「老餅」，又或者思想陳舊嘅人做「老餅」；香港人就同「老餅」起咗個英文名，叫做Old Cake。就係咁，啲人會將「舊思維」講做「老餅思維」。話講返轉頭，老唔一定思維「老餅」，而家嘅老人家好多時都有「新思維」，長期香港首富李嘉誠咪係囉！

有句成語「成也蕭何，敗也蕭何」，用來比喻事情嘅好壞或者成敗都由同一樣嘢造成。套用喺百年老店「蓮香樓」結業嘅情況，就係：

　成也老餅，敗也老餅

前者個「老餅」話「蓮香」係以賣「老餅」起家；後者個「老餅」話「蓮香」近代嘅經營者，冇同時代並進，仲用返「老餅思維」去經營，搞到間百年老舖淨得市場價值而冇市場競爭力。到最後，就以「疫情關係、經營不善」，呢個近排好興嘅藉口「拉閘」。據講「蓮香」仲留低咗筆「蘇州屎」有待清理，令人扼腕惋惜。

「蓮香」點「老餅」法？「蓮香」摺之前賣嘅「老餅」，仲用緊幾十年前嘅包裝，唔搞宣傳都算嘞，係咪最起碼都識得玩下「舊酒新瓶」呀！睇返「蓮香」最大嘅競爭對手「奇華」同「榮華」，無論喺宣傳同包裝上都好揼本。如果仲Keep住係咁，係咪有啲寒酸呢Hea？

做食肆最重要嘅係出品，來來去去都係得：「霸王鴨」、「砵仔焗魚腸」、「家鄉釀鯪魚」、「煎藕餅」、「冬瓜盅」嗰幾款「老餅」嘢，其實冇問題，因為呢啲係招牌菜，不過水準一定要保持到。好明顯近年呢個關口唔係好守得住；仲有，聽講應該好醒神嘅「老餅」都賣到過晒期！咁間嘢有返頭客先至奇！到近期咪淨係得返啲「老餅」去飲早茶，一盅兩件坐足兩粒鐘，賺晒都有數喇！搞到冇嚟生氣，市道好仲可以瞞天過海，市道一唔好就冇運行嘞！

以下一首打油詩概括咗「蓮香樓」百年基業嘅盛衰：

　《蓮香樓的前世今生》

廣州開舖叫連香 蓮蓉清香世無雙

陳大學士甚欣賞 因而易名做蓮香

煎釀鯪魚貌似真 霸王鴨款宴嘉賓

香焗魚腸食過讚 水滾茶靚冇得彈

品質保證做得到 遠近馳名省港澳

中秋月餅運遠洋 海外華人齊共享

落嚟香江開分店 幾代經營都好掂

一九社會突生變 百年基業難再延

服務多年情難捨 老伙記接手續寫

蓮香茶室再嚟過 多年茶客笑呵呵

一波未平又一波 新冠肺炎從天播

世紀疫情問點頂 不到一年死形形

舊主眼見咁坎坷 挺身硬接再起鑼

疫情未有緩和過 力挽狂瀾亦不果

全無預警再結業 飛卜宣布即時摺

原來欠薪已多月 冚旗走數何其絕

四四六六最完美 不樂見其衰收尾

殘酷現實心戚戚 蓮香樓永成追憶

百年老店難逃劫 兜兜轉轉都要摺

有緣再會屬美言 後會無期勢所然