梁振輝 香港資深出版人
一生何求？爭名逐利係主流，但係好多時喺求到嘅同時，你要喺體力上同心力上有相當嘅付出，有時仲要出賣尊嚴甚至靈魂。對於好少部分人嚟講，無形嘅尊嚴同靈魂先至係最有價值，擁有就等同擁有所有。又有人看透世情、淡泊名利，一生所求係心靈上嘅滿足，對俗世嘅冷言冷語一概唔放喺心上。常言道，有得必有失，但係又點會預料到，你所失去嘅竟然已經係你所擁有嘅一切。
1989年，一首由潘偉源填詞、陳百強主唱嘅電視劇主題曲《一生何求》，裏頭有一段歌詞就涉及以上相類信息：
誰計較讚美與詛咒
沒料到我所失的，竟已是我的所有
呢幾句歌詞，一唱就唱咗幾十年。除咗對語文有一定認識嘅人之外，一般人都係因為呢首歌咁流行，而接受咗陳百強唱「詛」字嗰陣唱咗做「咀」呢個讀音。唔好意思，咁嘅讀法係錯嘅！即係話：
一咀就咀咗幾十年，一唱就唱錯幾十年
「詛」咒讀做「佐」咒先至啱！
齋聽，唔睇歌詞或者字幕係睇唔出有咩問題，因為「詛咒」、「咀咒」係同義詞，不過寫「詛咒」就唔做得讀「咀咒」啫！提提大家，只有「沮喪」，係冇「沮咒」嘅！
喂，呢隻鑊應該邊個孭先？唔使問阿桂，一定係填詞人喇，因為詞係佢寫嘅，咬字呢個位當然係由佢把關。今次出錯係源於填詞人本身，誤以為「詛」嘅讀音係「咀」嘅原故；所以只要將歌詞嘅「詛咒」改返做「咀咒」，咁就乜嘢問題都冇嘞！
自上世紀七十年代，電視劇必定配上主題曲；一首好嘅主題曲，除咗可以唱到街知巷聞外，仲可以帶起電視劇嘅收視，可以講得係電視劇之魂。從呢時開始，樂壇就崛起一批又一批填詞人。由於主題曲填詞嘅需求好大，冇邊個出咗名嘅填詞人唔接job接到手軟！就算對嗰班填詞高手嚟講，填一首朗朗上口嘅歌詞，真係唔知要花上幾多心力，所以經歷咗十年八年面對着排山倒海嘅填詞量，講緊係一千幾百首，真係天才橫溢過李白、蘇東坡，都畀佢搾乾搾淨喇！舉個例：有填詞人就將「物轉星飛」呢個用嚟形容時光飛逝、事過境遷，睇落好似成語嘅四個字用返落去：
物轉星飛，你也在我心間。
無人可比氣勢，看盡物轉星飛交替。
物轉星飛，只想與你再一起。
有個成語叫「理屈詞窮」，意思係由於理虧而被反駁得無話可說。對於呢個唔夠一年「填來填去四個字」嘅例子，我哋都可以用「詞窮」嚟形容，所指嘅「詞」當然係「歌詞」喇！
對有一定語文根底嘅人，你同佢講「物轉星飛」，佢可能會反問乜唔係「物換星移」或者「斗轉星移」咩？又有人可能會話，意思都係差唔多，只不過係換咗兩個字啫！可以咁講，如果係成語，一般有定格；換句話即係唔喐得。如果你想玩二創，都要換啲啱意思嘅字先得。
好明顯，「物轉星飛」係由「物換星移」或者「斗轉星移」轉化過嚟，「星移斗轉」指群星移位、星斗轉動。「物換」指景物變換、變遷；事物更替、交替。睇返「物轉星飛」，填詞人用咗「轉動」而唔係「轉換」嚟描述景物變換、用咗「飛行」或者「飛舞」，而唔係「移動」嚟描述星斗移位，真係認真唔恰當！
話講返轉頭，如果將有問題嘅「物轉星飛」個「轉」字改做「轉變」個「轉」，將個「飛」字改做「遷移」個「遷」，咁就搞咗個又啱意思又好靚仔嘅二創「物轉星遷」出嚟喇！
0
已點過讚
0 / 255