梁振輝 香港資深出版人

1960年，由新馬仔、鄧寄塵主演嘅《因禍得福》，當中有首插曲，歌詞相當鬼馬：

嘩，滑脫脫似豬膏咁滑；牛油忌廉冇咁滑。

撩人面珠痛錫一啖；嘩，味香滑如食新鮮蛋撻。

人稱配音天王嘅譚炳文喺1973年唱咗一首好受歡迎嘅《牛油蛋撻》，部分歌詞如下：

滑滑嘟嘟，似豬糕咁滑；牛油蛋撻都無咁滑。

佢嘅迷人面珠，我想錫一啖；

味香滑甜似新鮮蛋撻。

後來呢首《牛油蛋撻》亦都成為咗有「廟街王子」之稱嘅尹光其中一首招牌名曲；不過，佢嗰條MV（音樂視頻）上字幕嗰陣就用咗「滑滑劣劣」而唔係「滑滑嘟嘟」。

無可否認，《牛油蛋撻》無論係曲同詞喺好大程度上都係「參考」新馬仔嗰隻插曲。不過有部分用詞有唔同嘅寫法，例如：前者用「豬膏」，後兩者用「豬糕」。新馬仔用「滑脫脫」，口語讀「滑脫3-1脫3-1」；譚炳文用「滑滑嘟嘟」，口語讀「滑滑劣3-1/劣3-1」，尹光用「滑滑劣劣」，口語都係讀「滑滑劣3-1/劣3-1」。

用肥豬肉嚟炸油，油凝固後呈膏狀，叫做「豬膏」，「豬糕」係誤寫。書面語嘅「嘟嘟」，口語讀「奪3-1奪3-1」，唔可以讀「劣3-1/劣3-1」；仲有，只有「胖嘟嘟」，即係廣東人嘅「肥嘟嘟」（肥奪3-1奪3-1），係冇「滑嘟嘟」（滑奪3-1奪3-1）嘅。書面語係從來都唔會用「脫脫」、「劣劣」嚟形容光滑，所以「滑脫脫」、「滑劣劣/滑滑劣劣」係唔存在嘅。

近年有唔少所謂粵語專家話「滑捋捋」先至係「滑劣劣」、「滑嘟嘟」嘅正寫。其實呢個講法一啲理據都冇，只不過係用咗「捋」呢個音咁上下嘅冷僻字啫。「捋」，讀「劣」，有兩個意思：一個解做「掹」、拔除，例如：「捋虎鬚」；正所謂老虎鬚你都夠膽掹，你都好冒險啫，「捋虎鬚」比喻冒犯厲害嘅人，同「太歲頭上動土」、「老虎頭上釘蝨乸」意思差唔多。另一個解做用手指順着抹過去，例如：「捋頭髮」、「捋鬍鬚」，使到頭髮或者鬍鬚平順光溜。可能有人睇到有個「滑溜」個「溜」字，於是就將「滑捋捋」引申到「滑溜」。

其實如果都識得講「滑溜」，點解唔諗下正寫會係「滑溜溜」呢？翻查字典，「順順溜溜」形容順利不受阻撓，「烏溜溜」形容非常黑，所以「滑溜溜」應該可以睇做非常之滑溜。通過音變，「溜」讀作「劣3-1」；再通過音變，「劣3-1」讀作「脫3-1」。

由於書面語會用「滑碌碌」嚟表示光滑順暢，同時通過音變，「碌」讀作「劣3-1」，所以「滑碌碌」亦都可以睇做正寫。話雖如此，大家喺溝通上最好都係用返「滑劣劣」，而冇需要用同音但係冷僻嘅「滑捋捋」。正所謂要借字都要借個冇咁深嘅字喇！