侯楚峰突破傳統 拼湊出驚喜

侯楚峰執導的《梨園荊夢》講十年人事，成信由社工走上藝術文化領域之路，並透過自己的工作着手文化傳承。流行音樂和粵劇本來風馬牛不相及，各有節奏。卻因與對音樂有着同樣執着的音樂系學生宇豪（林德信飾演）和名伶鳴鳳（米雪飾演）的相遇融會，三人幾經努力，終於突破傳統，大膽聯乘粵劇折子戲和流行音樂，拼湊出令人驚喜的創意。

被監製莊澄指野心大的侯楚峰，坦言什麼都想要：「想挑戰傳統粵曲及電音，拍之前要監製冒一個大風險，究竟拍出來會係咩？拍兩樣嘢加埋出來會係咩感覺，而將粵曲加上電音的確有好大困難，幸有音樂監製幫手，好多謝監製對我的信任。」

問到作為年輕人為何會揀粵曲作拍攝題材？侯楚峰稱跟兒時回憶有關：「小時嫲嫲住在廟街，樓下就係攤檔，每晚都loop一百次紅線女首《昭君出塞》。而今年疫情我最有感覺係原來大家坐埋食餐飯，入戲院睇場戲都咁難，我又唔覺得粵曲難聽、過時，不單止啱老人家聽。」

侯楚峰又指將粵曲與電音合璧拍攝，除有一定難度外，演員事前亦要配合：「戲中除咗林德信係音樂人，米雪有演過但唔係練唱腔，石修其實唔識中樂，拍攝前成個月都要練唱腔及中樂，大家由唔識拍到識，呢個亦係電影神奇有趣嘅地方。」問到他將中西音樂融合，是否想傳遞出什麼信息？他說：「『融合』在我的角度只不過係兩隻字，點解要融合？正如戲中林德信同米雪之後喺埋一齊，只不過想向前行出一步，達成自己的夢想，我想表達融合、傳承、夢想，全部都係字詞，但要去賦予溫度，正如戲中林德信一句對白『夢想好熱血，但好奢侈』， 我亦希望未來個世界都係。 」

侯楚峰又認為在香港要追夢「熱血」一番並不困難，可惜往往只是一時衝動，因為每個在追夢的人要放棄很多，才能繼續行。問到他可有為追求夢想而放棄一些東西？他說：「有時離開香港幾個月，會將家庭擺喺後面，但家人都會明白及支持我，（如何鼓勵年青一代？）最緊要毋忘初心，畀咗個溫度後就keep住去做，唔好畀自己離開個崗位。」